Ucele izibusiso eChibini uZweli Mkhize
UYAQINA umkhankaso woMgcinimafa-jikelele we-ANC,uDkt Zweli Mkhize, izolo ongenise esizindeni sikaDkt Nkosazana Dlamini Zuma, eHarry Gwala, eGugwini, eMzimkhulu, lapho amukelwe khona ngenhlokomo ebandleni laseChibini eyocela izibusiso.
UMkhize ogaqele isikhundla sikamengameli we-ANC njengoba kubhekwe engqungqutheleni kaDisemba ufike kuleli bandla wakhulekelwa.
UMkhize uya eMzimkhulu nje uphakanyiswe yigatsha lasoPhongolo esikhundleni sikamengameli emasontweni ambalwa edlule.
Uthe uyavuma ukungena embangweni njengoba kukhona amagatsha aphakamisa igama lakhe.
Ngesikhathi esukunyiswa kuchwaze ihholo kwashaywa amakhwelo. Ukufika kwakhe izolo kulandela ukuvakasha kukaNobhala-jikelele we-ANC kulona leli bandla ngoMgqibelo, uMnuz Gwede Mantashe.
Ethula inkulumo uMkhize uthe kubalulekile ukuthi uhulumeni angahambeli kude namabandla ngoba aneqhaza elikhulu ekulweni nezingqinamba ezihlupha uhulumeni kubalwa ububha, ubugebengu nezidakamizwa.
“Ukube intsha eningi ayikho emasontweni ngabe ayiqoqekile igcwele emajele ngoba ngabe yenza ubugebengu,” kusho uMkhize.
Uthe uma abantu abaningi bengangena emasontweni kungancipha ngisho nezinga eliphezulu lokubulalana.
“Abantu babulalana kangaka ngenxa yokuthi abasenabo onembeza ngoba umuntu okholwayo akenzi noma yikanjani ngoba uyakwazi ukulalela uNkulunkulu,” kusho uMkhize.
Uthe njengoba eseMzimkhulu asephelile amakhansela khona ngenxa yokubulalana okungaziwa ukuthi kusukaphi.
“Lokhu kubulalana okuqhubeka la eMzimkhulu kuwubugebengu nje obungamukelekile okudinga ukuthi buqedwe,” kusho uMkhize.
Uthe ingaphela nya indaba yokubulalana nokwehlukana phakathi uma kungaqedwa indaba yezinhlangothi enhlanganweni.
UMkhize uthe bayafisa amabandla ukuba aqhubeke nokulekelela uhulumeni ekwakheni isizwe.
Unxuse ukuthi kube nobumbano kwi-ANC njengoba bebheke engqugqutheleni kaDisemba.
“Kumele siye engqungqutheleni sibumbene siphinde siphume khona simunye hhayi le nto eyenzeka ePolokwane naseMangaung,” kusho uMkhize.
UNobhala we-ANC eMzimkhulu, uMnuz Mzolisi Ndobe uthe bona basabambelele kulokho ababetshelwe kona ukuthi njengoba babethuma uMkhize ekutheni abe nguMgcinimafa-jikelele babemqeqeshela ukuthi ngelinye ilanga angene ehhovisi likamengameli.
“Thina sazi ukuthi uMkhize njengoba ekade enguMgcinimafa-jikelele uma esuka kulesi sikhundla kumele angene ehhovisi likamengameli,” kusho uNdobe.
Uthe bayadideka manje njengoba sekukhulunywa ngegama lePhini likaMengameli uMnuz Cyril Ramaphosa noDkt Dlamini Zuma.