Uthembise ukubuyisela i-ANC kubantu
IPHINI likaMengameli uMnuz Cyril Ramaphosa lithe lizimisele ukwakha i-ANC engahambeli kude kubantu futhi ebalalelayo.
URamaphosa oseqhulwini kubantu abafuna ukungena esikhundleni sokwengamela i-ANC uma uMengameli Jacob Zuma esethathe umhlalaphansi, ubeseNorthern Cape izolo eyokhankasa.
Uthe njengoba bethi bakulungele ukuhola i-ANC bazimisele ukubumba le nhlangano nokulalela izimfuno zabantu.
Uqale esontweni wathi ucela isibusiso sokuthi i-ANC ihlangane ukuze iqhubeke nokuthuthukisa izwe.
“Ngiyazi ukuthi kulesi sifundazwe niyathanda ukuthi i-ANC ibumbane yingakho sizokwenza isiqiniseko sokuthi i-ANC ayihambeli kude nabantu futhi iyabalalela. Sizophinde siqinisekise ukuthi izinkampani zikahulumeni zenza inzuzo ngokuthi zisebenze kahle,” kusho uRamaphosa.
Uvumile ukuthi izinkampani zikahulumeni zisetshenziswa ngabathile ukufeza izinhloso zabo wathi kufanele abatholwa benecala lokweba imali kulezi zinkampani bayibuyise.
Uthe osozimboni abamnyama bazoba khona uma abantu benomhlaba futhi nezinkampani zikahulumeni zihlomulisa wonke umuntu hhayi idlanzana.
Uveze nokuthi bayaweseka umzabalazo wokuthi imfundo ibe mahhala ngoba iyona ekwazi ukugqashula amaketango enhlupheko.
“Sifuna intsha yethu engaphezu kuka-1 million isebenze futhi ifunde mahhala ukuze ibe namakhono adingekayo ukuthuthukisa izwe lethu. Ayiyinhle le nto yokuthi izingane zihlale emakhaya,” kusho uRamaphosa.
Ubonge nowayenguNdunankulu waKwaZulu-Natal uMnuz Senzo Mchunu ngokuza emcimbini waseKimberly wathi kudingeka abaholi abafana noMchunu ukuze izwe liye phambili.
Khonamanjalo, uDkt Nkosazana Dlamini Zuma ubeseNyanga, eCape Town, emcimbini we-ANCYL kanti naye ushumayele ivangeli lobumbano. Uthe uma sekungenelwa ukhetho lokuhola i-ANC abahlulwayo akufanele badube kodwa kufanele basebenze nabanqobile ukuze kwakhiwe iNingizimu Afrika engcono.
Udonse ngendlebe intsha ukuthi isebenzele ukuthuthukisa izwe, ifunde futhi ilwe nezidakamizwa, utshwala nokukhulelwa.
Uthe uzosebenza kanzima ukuqeda ububha alethe nezinsiza ezizothuthukisa amakhono entsha ezifana noswimming pool ukuze kube nababhukudi abamnyama.