Bahlukene ngokufungiswa kukaDlamini Zuma
KUHLUKENE imibono mayelana nesinqumo sikaMengameli Jacob Zuma sokuqoka uDkt Nkosazana Dlamini Zuma abe ilungu lePhalamende.
UDkt Dlamini Zuma kulindeleke ukuba afungiswe kwesokuba ilungu lePhalamende maduze njengoba ezovala isikhala sikaMnuz Pule Mabe owesula emsebenzini ngenyanga edlule ngoba efuna ukugxila emabhizinisini.
Umhlaziyi wezepolitiki ozimele KwaZuluNatal uMnuz Thabani Khumalo uthe ubona sengathi umengameli uphambukile ngalesi sinqumo ngoba bekulindeleke ukuthi avale lesi sikhala ngomuntu osemusha.
“Intsha izokhala ngokuthi kwenzeka kanjani ukuthi kuphume esikhundleni umuntu osemusha indawo yakhe ingavalwa ngomunye umuntu oyintsha kodwa kuvele kufakwe umuntu osemadolonzima,” kusho uKhumalo.
UKhumalo uthe umengameli sizomdalela amazinyo abushelelezi lesi sinqumo njengoba kunesikhalo nasezinkundleni zokuxhumana.
Omunye umhlaziyi wezepolitiki, uSolwazi Bheki Mngomezulu uthe ubona lesi sinqumo sizowuqinisa umkhankaso kaDkt Dlamini Zuma njengoba egaqele isikhundla sikamengameli engqungqutheleni kaDisemba.
“Manje uma ekhankasa usezokhankasa njengelungu lePhalamende kanti phambilini bekuthanda ukuba nzimana njengoba kade ekhankasa ngokuzimela engekho ezinhlakeni ze-ANC ngaphandle kokuba ilungu lesigungu esiphezulu kwi-ANC,” kusho uMngomezulu.
UMngomezulu uthe ukungena kukaDkt Dlamini Zuma ePhalamende kuzoqeda nomsindo oke washuba mayelana nokuhlinzekwa kwakhe ngabaqaphi.
“UMengameli kodwa kumele angalinge azame ukuphendula imibuzo mayelana nokuhlinzekwa ngabaqaphi kukaDkt Dlamini Zuma ngoba mhlawumbe angathi uyaphendula kanti useyazigaxelisa,” kusho uMngomezulu.
USotshwebhu we-ANC ePhalamende uMnuz Jackson Mthembu ukuqinisekisile ukuthi uDkt Dlamini Zuma uzofungiswa kwesokuba ilungu lePhalamende.
UMthembu uthe uDkt Dlamini Zuma ubevele esohlwini lwamagama abantu abangangena ePhalamende ngisho ngaphambi kokuthi ahambe ayoba nguSihlalo we-African Union.