Sizokhuluma uma kukhona okungahambi kahle: Nzimande
UNOBHALA Jikelele we-SACP, uDkt Blade Nzimande, uthi bazoqhubeka nokukhuluma uma kukhona okungahambi kahle kuhulumeni ngisho besatshiswa ngokuthi bazolahlekelwa wumsebenzi.
UNzimande ubekhuluma nabaholi beCosatu emcimbini obuseCoastlands Hotel, eThekwini, izolo emuva kokusabalala kwemibiko yokuthi uDkt Nkosazana Dlamini Zuma uzongena ePhalamende futhi kuzokhishwa amalungu eSACP.
Kule mibiko kuthiwa uNzimande uzokhishwa ePhalamende isikhundla sakhe sivalwe ngoDkt Dlamini Zuma oseqhulwini lwabaholi abangenela ukhetho lokwengamela i-ANC uma uMengameli Jacob Zuma esethatha umhlalaphansi.
“Siyasatshiswa ngokuthi sizokhishwa ezikhundleni. Uma befuna ukuzithatha izikhundla zabo abazithathe. Ngeke sithule ngoba sisaba ukuphelelwa wumsebenzi,” kusho uNzimande.
UNzimande uthe ngeke akwazi ukukhuluma kakhulu ngalolu daba lokukhishwa ezikhundleni kongqongqoshe ngoba lusengamahlebezi okwamanje.
“Umbuzo esifanele siwubuze njengamakhomasi wukuthi ngabe i-ANC isazokwazi ukuzelapha noma sekonakele unomphela. Abantu banemikhankaso wokudicilela phansi abanye futhi baqaphe yonke iminyakazo yethu singamakhomanisi,” kusho uNzimande. UNzimande ubekhuluma ngemuva kwePhini likaNgqongqoshe wezokuDoba, amaHlathi noLimo, uMnuz Bheki Cele, othe i-ANC ihlukene phakathi. “Ubuholi obuphezulu be-ANC yibona okufanele sibugxeke ngesimo esisibona KwaZulu-Natal. Ukuqaliswa kwengqungquthela yobuholi besifundazwe kusasele izinyanga eziyisithupha kwakungafanele. Sabona amalungu e-ANC eselwa wodwa. I-ANC ifakana ezinkantolo eFree State, KwaZulu-Natal nase-Eastern Cape,” kusho uCele.
Uthe inkinga wukuthi i-ANC ayisabaholi abantu yingakho lowo msebenzi usuwenziwa yizinkantolo.
Ubalule ukuthi i-ANC ilahlekelwe ngomasipala abakhulu naseNquthu yehlulwa kwabuyela i-IFP.