ISilo sigxeke uKhozi FM ngokufa kolimi
ISILO samabandla uZwelithini kaBhekuzulu sigxeka umsakazo uKhozi FM ngokubulala ulimi lwesiZulu esikhundleni sokulugcina nokuluvikela.
Imbube ikusho lokhu ngesikhathi ikhuluma esigodlweni sayo Enyokeni, KwaNongoma, ngoMqgibelo.
Sikhale ngokuthi uKhozi alukunakile ukuthi luhlalelwe umsebenzi wokufundisa abantu kabanzi ngolimi lwabo ngoba luyigugu lesizwe Sithe lesi siteshi simenzela phansi uZulu. “Ngabona ngokuthi bashintshe igama elinoZulu bethi bawuKhozi. Bavele basiqamba ngenyoni nje, sekuyacaca ukuthi babeqonde khona ukubulala ulimi.’’
IMbube ithi leli gama lenyoni ayazi ukuthi lichaza ukuthini kulo msakazo ongeminye yemisakazo emidala nolalelwa kakhulu kwelengabadi.
Ithe ulimi lwebele lubhedwa mihla namalanga emsakazweni kodwa yiwona omkhulukazi kuleli yathi lokho kuyihlazo.
Ukusetshenziswa budedengu kolimi emsakazweni iSilo sithu kunomthelela omubi ngoba isizwe sibukela kuwona, lokhu kuchaza ukuthi uZulu wonke ungena ehlathini.
“Ulimi lwenu luthandwa ngisho phesheya njengoba nibabona abasuka khona bayazihlupha ngokulufunda sebazi ngisho amaculo esiZulu. Lesi sizwe sidumile,’’ kusho Isilo.
Besikhuluma ngeqembu lezintokazi zaphesheya ezicula ngesiZulu, ezicule kwachazeka inqwaba. UNdunankulu kaZulu, uDkt Mangosuthu Buthelezi ubonakale emamatheka eshaya ihlombe ebonakala sengathi uchazekile.