Luncome amaBhunu lucela ukuphatha
ISILO samabandla uGoodwill Zwelithini kaBhekuzulu sicela ukuthi sinikwe ithuba lokuphatha uhulumeni KwaZulu-Natal iminyaka emithathu ukuze siqondise konke okungahambi kahle.
UHlanga Lomhlabathi lukhulume eMkhosini woMhlanga esigodlweni, Enyokeni KwaNongoma, ngoMgqibelo.
Luthe kuningi okungahambi kahle olufisa ukuzibambela kona ukuze kuqonde.
“Kubuhlungu ukuphathwa ube uphethe, namanje ngisasho nginikeni iminyaka emithathu bese ninginika imali. Ngimfunge uMamonga kungaqonda kuthi ngqo,” kusho Imbube ifunga Isilo uDinuzulu kaCetshwayo.
ISilo sikhale ngezinkinga eziningi ezikhungethe isifundazwe nezwe lonke sathi uhulumeni wehlulekile ukuphatha ngendlela wedlulwa uhulumeni wamabhunu.
“Ayeliphethe izwe amabhunu, ayenamaqhinga nakuba ayesicindezele kodwa aliphatha kahle. Kusafanele nixhumane nawo anihabulise ngoba ayikho le nto’’ kusho iSilo ebesikhuluma sithethe siyaluze phambi kwezethameli.
Sikhwele sadilika kubaholi besifundazwe sibasola ngokumosha isikhathi nemali ngekhomishini kaMoerane ephenya ngokubulawa kosopolitiki. Le khomishini isungulwe uNdunankulu wesifundazwe uMnuz Willies Mchunu njengoba osopolitiki ikakhulukazi abe-ANC beqothwa ngenhlamvu kulesi sifundazwe.
“Bahlala bebulawa abantu anikaze nasungula ikhomishini, sekuthi ngoba kufa osopolitiki senigijima nisungula amakhomishini. Siluthelwani ngempela, kudlalelwani ngathi?”
Sikhale ngokuthi laba baholi besifundazwe bahlala begadwe ubusuku nemini kodwa abantu bayabulawa abagadwe muntu. Imbube ilibeke ngembaba elokuthi iwumbhedo indaba yamakhomishini ngeke isize ngalutho kodwa abantu okufanele bakhulume nombeza babo.
“Kubuhlungu uma ngibona kuchitheka igazi kangaka ezweni. IGlebelands inehlule, abantu bafa usuku nosuku, kugobhoza igazi yonke indawo”.
UMkhosi woMhlanga ubunenqwaba yabantu kukhona nabaphesheya kwezilwandle, nabavela ebukhosini baseSwaziniland.
Phakathi kosopolitiki abebekhona uDkt Zweli Mkhize ongumgcinimafa we-ANC kuzwelonke, uNksz Bathabile Dlamini ongqongqoshe wezokuThuthukiswa koMphakathi kuzwelonke nabanye.