Kutholakale isidumbu esikhotheni
USHAQEKILE umphakathi waKwaDabeka B, ngaseClermont emuva kokutholakala kwesidumbu sendoda esikhotheni sesiqala ukonakala.
Ukutholakala kwalesi sidumbu kwenzeka ngemuva kwezinsuku ezimbalwa kutholakale isidumbu somfundi waseZiphathele Secondary naso silahlwe esikhotheni ngoMsombuluko odlule.
Isidumbu somfundi waseZiphathele sitholwe ngamalungu omphakathi ngoMsombuluko ntambama sisele ngephenti kwesingezansi.
ICongress of South African Students (Cosas) icele ukuthi kwandiswe amaphoyisa eClermont ngoba izinga lobugebengu liphezulu.
UBuyanda Gama, uNobhala Jikelele weCosas KwaZuluNatal, uthe bafuna kwandiswe amaphoyisa ukuze abantu bakwazi ukuhamba ngokukhululeka.
Abantu abakhulume neSolezwe kodwa bacela ukuthi bangadalulwa amagama bathe bakhathazekile ngomkhuba othanda ukwanda wokubulawa kwabantu bese belahlwa esikhotheni.
“Sicela amakhansela atshele umasipala ukuthi ubhushe amahlathi ngoba isimo sibi. Siphila kanzima sesisaba nokuhamba uma kuke kwahlwa ngoba izigebengu zithatha amaselula bese zikubulala,” kusho ilungu lomphakathi.
Lithe isimo sibi ngoba kubulawa ngisho izingane uma zike zagoloza namaselula nezikhwama.
UColonel Thembeka Mbhele wamaphoyisa KwaZulu-Natal, ukuqinisekisile ukuthi kutholakale isidumbu wathi okwamanje akwaziwa ukuthi ngesikabani.
“Sicela abalahlekelwe yisihlobo baziveze ngoba isidumbu esitholakele akwaziwa ukuthi ngesikabani. Sivule idokodo futhi besingakayitholi imbangela yokufa ngoba bese siqala ukonakala,” kusho uColonel Mbhele.