Kusazodonsiswana ngokuphindwa koweBafana
KUBUKEKA kusazoba khona ukudonsisana mayelana nomdlalo weNingizimu Afrika neSenegal iFifa ethi ungase uphindwe ngoNovemba.
Lo mdlalo wokuhlungela iNdebe yoMhlaba ka-2018 eRussia, wadlalelwa eNingizimu Afrika nyakenye kwawina iBafana Bafana ngo-2-1. Nokho kwaba nezidubedube ezibandakanya nephenathi engacacile eyanikwa iBafana, okwaholela ekutheni kuxoshwe unompempe owayewuphethe uJoseph Lamptey.
Ngeledlule iFifa iyalele ukuthi umdlalo uphindwe ngoNovemba ngoba indlela owaphathwa ngayo ayihambisani nayo. Lokhu kuchaza ukuthi iNingizimu Afrika isiyibambe emsileni ngephuzu ngemuva kwemidlalo emithathu yokuhlungela iNdebe yoMhlaba (uma ungabalwa oweSenegal) kuGroup D. ISouth African Football Association (Safa) ithi ngeke isamukele isinqumo sokuphinda umdlalo.
NeBurkina Faso izwakalise ukungenami ngokuthi iSenegal izonikwa elinye ithuba. Phela iBurkina Faso iyona ezihola phambili ngamaphuzu ayisithupha yingakho ikhala kakhulu ngokuphindwa komdlalo. Uma iSenegal ingawina ingazithola isesicongweni ngamaphuzu ayisishiyagalombili.
IFifa, njengenhlangano ephethe ibhola emhlabeni, kumele iziqaphele izimo ezisusa umsindo njengalesi sokuphindwa komdlalo weBafana neSenegal. Abaningi babuza ukuthi kungani umdlalo kumele uphindwe uma kuyiphutha likanompempe eliholele kulo mphumela owinise iNingizimu Afrika? Nayo iFifa ikubeke kwacaca ukuthi iNingizimu Afrika neSenegal bamsulwa kulolu daba kodwa kwaba wubudedengu bukanompempe.
Kuyaziwa ukuthi ngokushintsha kwezikhathi le nhlangano yebhola (iFifa) inemvume yokushintsha imithetho yayo ukuze kungabi khona ukwenzelela emiqhudelwaneni engaphansi kwayo. Nokho abaningi bavele bakhumbula indaba kaDiego Maradona wase-Argentina noThiery Henry waseFrance, abashaya amagoli ngezandla kodwa imidlalo yangaphindwa. Uma iFifa isifuna ukulandela umthetho wokuthi imidlalo izophindwa uma unompempe enze iphutha, kusho ukuthi miningi impela ezobuyela enkundleni ingakapheli imidlalo yokuhlungela iNdebe yoMhlaba ka-2018.