Isibhedlela eMnambithi siyefana nesingekho
MHLELI: Ake ngigalele ngokukhulu ukungachemi kanye nokwenzelela. Ngizwakalisa isikhalo sami ngodaba lesi bhedlela esikwaZulu-Natal eMnambithi esibizwa ngeProvincial Hospital.
Izinga lokuzimisela konesi bakhona liphansi kakhulu kanti namambawu izinga lawo liphezulu bese kuholela ekutheni bengawenzi umsebenzi wabo njengoba baqashelwa ukuba bawenze. Ukunikezwa kwephilisi ipanado akusho ukuthi sengizophila kodwa uma ngabe ngizothi ngizofuna usizo bese ungithethisa ekugcineni ungidedele ngihambe ngiye ekhaya ngingalutholanga usizo lokho kukodwa nje kuyakhalisa.
Angisho ukuthi bonke banjalo kodwa iningi labo liyabheda. Ngakhoke nginesicelo sokuthi uMnyango wezeMpilo ake usukume uphenye ngalesi sibhedlela ngoba asiwusizi ngalutho umphakathi.
Angisho ukuthi bengakuvimba ukufa komuntu kodwa ubudedengu babo onesi yibona obenza abantu baphelelwe wunembeza wokuphila. Ngikhuluma nje ngakithi kusanda kushona ababili eSahlumbe kuso lesi sibhedlela kanti amanye amalungu omphakathi angeniswe ngemuva kwengozi yetekisi ebithwele abagibeli eginqike kwenye yezindawo ezakhele uMnambithi kushone umuntu oyedwa abanye balimala.
Akade belethwe ngamaambulance bafike badedelwa bengenziwe lutho bahamba baya emakhaya. Imindeni yabo ithi abanye babo bakhala ngezinhlungu eziqaqambayo kodwa onesi kabanaso isineke sabo. UNgqongqoshe wezempilo KwaZulu-Natal, uDkt Sibongiseni Dhlomo, (osesithombeni) ake asukume ephenye kabanzi ngalesi sibhedlela esesikhalise umphakathi ngoba akekho ongalashwa yisidakwa kanye nomuntu ongenalo uzwelo. Okhathazekile ESAHLUMBE