Izifezile izethembiso injinga uReddy
IZIHLATHI zivakashele izindlebe kubasebenzi bakamacaphunakusale waseThekwini, uMnuz Vivian Reddy ngesikhathi benikezwa ngokusemthethweni izitifiketi zobunikazi bamasheya abo ehhotela likaR700 million elizoba seMhlanga, iRadisson Blu.
NgoLwesihlanu, uNkk Veronica Chamane (45) noNksz Princess Luthuli (34) bathe bayajabula ukuthola izitifiketi zobunikazi bamashaya ngoba bese kukhona abantu abathi ayikho le nto yabo.
“Abantu bebethi kwakudlalwa ngathi ngeke abakwaReddy basiphe amasheya sibe sisebenza ezindlini. Njengoba sesithole izitifiketi ezishoyo ukuthi singabanikazi bamasheya siyathemba bazovaleka umlomo,” kusho uNksz Luthuli emamatheka.
UNkk Chamane uthe abanye abantu bebethi umqashi ufuna udumo ngokubanika amasheya kodwa bona bebazi ukuthi ayikho leyo nto.
“Angikaze ngicabange ukuthi ngiyoba namasheya empilweni yami, angisaphathi-ke awehhotela lika-R700 million. Ngiyajabula nokuthi sesithole izitifiketi zobunikazi bamasheya. Ngifisa abanye abaqashi bathuthukise abasebenzi babo bangagcini ngobubaholela kodwa bafunde kumama Reddy (Sorisha Naidoo) nobaba uReddy (Vivian) abenze into ezosisiza noma sesithathe umhlalaphansi,” kusho uNkk Chamane.
Uthe unamadodakazi amabili eyodwa yenza u-matric, enye yenza unyaka wesibili ezifundweni ze-mechanical engineering.
UNksz Luthuli oneminyaka emine esebenza emtholampilo kankosikazi kaReddy uthe unezingane ezimbili umfana ofunda u-grade 10 nentombazanyana efunda enkulisa.
UMnuz Khanyisani Richardson Msibi osebenza egarage lakwaCaltex eMhlanga uthe wathenga amasheya emuva kokuthola amafomu kwiSolezwe.
“Abanye bebengabaza ngoba bezitshela ukuthi yibhanoyi mina ngaba nesibindi ngoba yinto eyayiphambi kwami. Isitifiketi sobunikazi bamasheya ngisithole ngoJuni. Ngithenge amasheya angu50 futhi ngiyajabula ngesinqumo sami,” kusho uMsibi.
IRadisson Blu Hotel, iyingxenye yohlelo luka-R3.8 billion olubizwa nge-Oceans Umhlanga.
UMnuz Brian Mpono onguMqondisi wohlelo lwe-Oceans Umhlanga uthe abantu sebezitholile izitifiketi zobunikazi bamasheya kodwa kunabantu abangu-500 abangakazitholi ngenxa yokuthi abayifakanga imininingwane yabo.
“Ozaziyo ukuthi wakhokha wangayithumela ikhophi kamazisi, ubufakazi bekheli, yi-subscription form nencwadi yasebhange eqinisisekisa ukuthi i-akhawunti ngeyakhe akasondele ukuze sizolungisa izinto zakhe athole isitifiketi,” kusho uMpono.
Uthe abanye abantu bagcina ngokukhokha bangayifaka imininingwane efanele njengereferrence number.
“Bangaphezu kuka-20 000 abantu asebethole izitifiketi zobunikazi bamasheya futhi umsebenzi uyaqhubeka njengoba ogandaganda sebeqalile ukumba kwenziwa nesikubiza nge-scoping,” kusho uMpono.