Izobashiya benkemile i-Essence yakuleli
ZIZOBHEMA zikholwe izethameli embukisweni omkhulukazi oza okwesibili eThekwini, i-Essence Festival ozoqala ngoSepthemba 28 uphele ngo-Okthoba 1 kwazise kuzonandisa amaciko ahlukene kusukela kubabhali bezincwadi nezinkondlo, abadwebi namanye.
Ukuletha amaciko ahlukene kuyingxenye yokuqinisekisa ukuthi inakho konke okwenza i-Essence Festival yaseNew Orleans ibe mnandi kwazise iba nombukiso obizwa ngeMardi Gras.
Esitatimendeni esithunyelwe kwiSolezwe, abahleli be-Essence Festival bathe umbukiso wobuciko uzoba seNkosi Albert Luthuli International Convention Centre (ICC).
Kuzoba nemibukiso emigwaqweni yaseThekwini. Amaciko azohlomula ngezingxoxo komakadebona bamaciko okubalwa uPenelope Siopis, Thenjiwe Niki Nkosi oyiciko elizinze eGoli elisanda kuba nombukiso eLouis Vuitton Museum eParis.
Izingxoxo zamaciko zizoba ngoSepthemba 29 ziphele goSepthemba 30.
Umhwebi wezinto zobuciko uMnuz Stephan Welz uzohlomisa abantu ngolwazi lokutshala imali kwezobuciko.
Kuzoba nombukiso wezichuse ozokwenziwa ngamaciko esifazane ozohlanganisa izilwane zasendle okubalwa izindlovu, ama-dragon nezithombe ezenziwe ngobuhlalu.
Kuzobakhona namaciko asuka emazweni angaphandle okubalwa avela esiqhingini iReunion, Mozambique, Cape Town, Johannesburg, Port Elizabeth nawaKwaZulu-Natal.
Amaciko azokhangisa ngomsebenzi wawo aphinde acobelele abanye ngolwazi.