Abasayingeni eyeSundowns
ABASAYIZWA eyokudlala kwiMamelodi Sundowns abadlali ababili abanqatshelwe ukuhamba, uThela Ngobeni noSiyanda “Jojo” Zwane, abalizwa ngendaba ijezi eqenjini elikhulu.
Babonakale eqenjini leSundowns leMultiChoice Diski Challenge. Bavithizwe yiBloemfontein Celtic ngo 3-0 eSugar Ray Xulu Stadium, eClermont, eThekwini, ngoMgqibelo.
Ngemuva komdlalo baxoxe nabezindaba badalula isifiso sabo sokushiya iSundowns.
“Isizathu sokuthi ngibambe iqhaza kwiMDC yingoba ngilambele ukudlala. Ngesizini edlule angizange ngilithole ithuba elanele lokudlala. Ngumdlalo wokuqala lona ngemuva kwezinyanga eziyisishiyagalombili esengike ngawuqala ngawuqeda.
“Yisizini yami yokugcina le kwiSundowns. Abantu abaningi sebengikhohliwe njengoba ngingadlali ngakho ithuba nethuba engilitholayo kumele ngilisebenzise. Ngisifakile isicelo sokushiya kwiSundowns. Nokho iqembu likhethe ukuwusebenzisa umbandela ebelinawo wokwelula inkontileka yami. Banqabe ukungidedela ngenxa yokuthi ngisohlwini lwabadlali abagijima kwiCAF Champions League futhi asinabo abadlali abaningi. UZwane ubanga ijezi no-Anele Ngcongca, Asavela Mbekile obuye ayibambe esiswini noThapelo Morena obuye ayibambe ngakwesokudla phambili.
“Kunamaqembu ebengikhuluma nawo abezimisele ukungisebenzisa. Besilokhu silindile sifuna ukubona ukuthi iSundowns izowusebenzisa yini umbandela noma cha. Yize bengifisa ukuhamba kodwa umqondo uselapha kwiSundowns okwamanje ngoba ngigcine ngingahambanga.
“Umdlali ofana nami akakufanele ukuhlala ebhentshini, ngineminyaka engu32, yingakho ngisafuna ukudlala eminye iminyaka. ISundowns ngiyithanda ngenhliziyo yami yonke kodwa kwesinye isikhathi uthando kumele ulubeke eceleni,” kusho uZwane.
UNgobeni uthwele kanzima kwazise ubanga ijezi nonozinti abangonombolo 1 emaqenjini abo esizwe. Ubanga noDenis Onyango ongukaputeni weqembu lesizwe lase-Uganda noRazak Brimah ongunozinti wokuqina weqembu lesizwe eGhana.
“ISundowns yiqembu lami. Ngikholwa wukuthi bekumele ingidedele ngibolekiswe. Buka manje ngizithola ngisesimeni lapho ngidlala khona iMDC. Abafana abaningi engidlala nabo lapha kwiMDC baneminyaka engu-16 no-17 kanti mina ngineminyaka engu-28. Ngifanelwe wukudlala njalo kwiPremier Soccer League. Lapha kwiMDC ngizovalela abafana abancane ithuba. “Angeneme ngokuthi iqembu lenqabile ukuthi ngiphinde ngibolekiswe kwiFree State Stars. Ngebhadi-ke basithathile isinqumo ngabebefuna ukukwenza. Njengomdlali kumele ngamukele isimo bese ngilwela ijezi. I-MDC ngidlale kuyona amasizini amathathu angiboni ukuthi ngisafanelwe wukudlala kuyona. Ngikubona njengokubuyela emuva ukudlala kuyona,” kusho uNgobeni.