Abuyise ithemba aweKZN kweyeDiski

AVULE ngenothi eliphezulu amaqembu aKwaZuluNatal kwiMultiChoice Diski Challenge ngempelasonto.

Izolo iMaritzburg United ithele othulini iFree State Stars ngo 2-1 emdlalweni weMultiChoice Diski Challenge. Amagoli aweze iTeam of Choice ngelibanzi abhakuziswe enethini nguDevon Saal noMohau Mokate. Elokubika leFree State Stars lishaywe nguThabo Maphakisa.

Ngemuva kwalo mdlalo iLamontville Golden Arrows ixebule iKaizer Chiefs ngo 3-2 emidlalweni weMultiChoice enkundleni efanayo. Amagoli e-Arrows abaselwe enethini nguSiyabonga Dube, Yosuf Jappie noSiyanda Dlamini.

AweChiefs abhajiswe ezintanjeni nguNkosingiphile Ngcobo noLucas Moses. I-Arrows iyona ebivikela isicoco ngesizini edlule. Isicoco sayo sigcine sikhale semuka neMamelodi Sundowns.

Ukuqala kahle kwamaqembu aseKZN kunike abalandeli ithemba lokuthi lesi sicoco kungenzeka sibuyele kulesi sifundazwe. Elinye iqembu laseKZN eliyingxenye yalo mqhudelwano AmaZulu. Leli qembu yisizini yalo yokuqala kule ligi kwazise izikhulu zoSuthu zithenge ilungelo leThanda Royal Zulu lokudlala kwi-Absa Premiership.

Liguqiswe yi-Orlando Pirates ngo 2-1 eSugar Ray Xulu Stadium ngoMgqibelo emini. Abalandeli abazange baphoxe eClermont kwazise bebephume ngezinkani ngoMgqibelo nayizolo. Ibhola nalo alizange libaphoxe ngoba beliseqophelweni eliphezulu okufakazelwe yindathane yamagoli.

NgoMgqibelo abalandeli banyakaziswe ngumculi weKwaito uProfessor kwathi izolo uDuncan wabaqhululela amanoni akhe e-hip pop. Ngempelasonto Abafana Bes’thende bazovakashela iCape Town City eParow Park bese kuthi ngeSonto, Usuthu lududulane nePlatinum Stars enkundleni esazomenyezelwa.

Ngalo iSonto iTeam of Choice izoshukana neMamelodi Sundowns eHarry Gwala Stadium ngo-12 emini.

Imiphumela yeMDC: Golden Arrows 3-2 Kaizer Chiefs; Marizburg United 2-1 Free State Star; Cape Town City 7-0 Polokwane City; SuperSport United 0-0 Platinum Stars; AmaZulu 1-2 Olrando Pirates; Chippa United 1-3 Ajax Cape Town; Bloemfontein Celtic 3-0 Mamelodi Sundowns; Baroka FC 1-1 Bidvest Wits