Idlulile kuBrockie eyokuvalwa kwebheke kwiDowns
AKANANXA nokunqatshelwa ukuyodlala kwiMamelodi Sundowns umgadli weSuperSport United uJeremy Brockie ofake Amatsatsantsa a Pitori kowamanqamu weMTN 8.
UBrockie nguyena obhakuzise enethini amagoli amabili angcwabe iMaritzburg United emdlalweni we-semi final yeMTN 8 eHarry Gwala Stadium, eMgungundlovu, ngoMgqibelo ebusuku. ISuperSport iguqise iTeam of Choice ngo-2-0 emlenzeni wesibili womdlalo we-semi final yeMTN. Umlenze wokuqala uphele ngo-1-1 ePitoli emasontweni edlule.
Ngemuva komdlalo uTinkler utshele abezindaba ukuthi uBrockie useyidlulisile indaba yophuthwa yithuba lokuyodlala kwiSundowns. Lo mdlali uze wafaka isicelo sokushiya kwiSuperSport.
“Indaba kaBrockie kade ngayidlulisa, naye uBrockie kade eyidlulisile. Uyaqonda ukuthi uma sekuyisikhathi esifanele sokuthi ashiye uzohamba. Siyazi ukuthi yini angayenzela iqembu. Usesenzele izinto ezinkulu,” kusho uTinkler.
UTinkler usefinyelele kowamanqamu kuwo wonke amasizini njengomqeqeshi ozimele. Uqale ukusebenza njengomqeqeshi ozimele kwi-Orlando Pirates kumasizini amathathu adlule.
Ngo-2014 ufake iPirates kowamanqamu weCAF Confederation Cup kwathi ngo-2015 wayifaka kwifayineli yeNedbank Cup. KwiConfederation Cup uthelwe othulini yi-Etoile du Sahel yaseTunisia kwathi kwiNedbank Cup wagilwa yiSuperSport aseyiqeqesha.
Ngesizini edlule usize iCape Town City yakhala yemuka nesicoco seTelkom Knockout.
“Bekuyisifiso sami ukufinyelela kowamanqamu walo mqhudelwano. Ngeneme ngokuthi ngikwazile ukuzuza lokho. Bengifuna ukuqala ngegiya eliphezulu,” kusho uTinkler.
ISuperSport izodlala umdlalo wesithathu wamanqamu kulandelana. Idliwe yiCape Town City kowamanqamu weTKO yase iphakamisa iNedbank Cup ngesizini edlule.
“Njengamanje umqondo wami ugxile kwiPlatinum Stars. NgoLwesibili (kusasa) kumele sithole umphumela omuhle. Bazobe beshaya ngomqeqeshi omusha (uRoger de Sa) ngakho bazofika kithina bekhuthazekile. Uma sekushaye isikhathi sokubhekana nomdlalo wamanqamu sizobe sesigxila kowona,” kusho uTinkler.
Umqeqeshi weMaritzburg, uFadlu Davids, uyivumile induku.
“Ngidumele kodwa ngakolunye uhlangothi kumele sivume ukuthi bebeyiqembu elingcono kunathi. Basebenzise amava. Abadlali bethu abancane bafunde lukhulu futhi ngiyethemba izifundo bazozisebenza kangcono,” kusho uDavids.