‘Wuthando olwenza sihlale ndawonye’
INGWAZI yekwaito ebishadelwa eRandburg ngeSonto, uMandla “Spikiri” Mofokeng, ithi uthando yilo olwenze yahlala iminyaka engaphezulu kuka-20 ithandana nomkayo.
USpikiri nomkakhe, uRushka, abanezingane ezine, bashade umshado omhlophe.
“Sashada kudala ngokwesintu. Umshado bekuyindlela yokugubha ukuthi sesibe ndawonye isikhathi eside,” kusho uSpikiri.
Uthe kuwuhlelo lukaNkulunkulu ukuthi babe ndawonye isikhathi eside kangaka nezingane zabo sezize zakhula.
“Angisoze ngahlukanisa nenkosikazi yami. Ngifuna ukuguga nayo. Angifuni ukuthi izingane zami zikhuliswe womunye umuntu. Kumele zikhuliswe wunina noyise. Angifuni bezwe ukuhlukumezeka,” kuchaza uSpikiri.
Uthe okwenze uthando lwabo lwadonsa iminyaka yingoba baphethene kahle nomkakhe.
“Kubalulekile ukuthi uwuphathe kahle umndeni wakho ngoba uzohlala ukhona noma ngabe kwenze njani.”
Ugqugquzele nabanye besilisa ukuthi babaphathe kahle abantu besifazane nezingane.
“Kumele sibathande futhi sibanakekele. Umndeni wami ngiwuthanda ngenhliziyo yami yonke.”
USpikiri uphinde wadalula ukuthi basestudiyo kulezi zinsuku balungiselela ukukhipha ama-albhamu abaculi abaqopha enkampanini yakhe, iKalawa Jazmee .
Kubaculi athe bazokhipha amaalbhamu kulo nyaka nangonyaka ozayo, kubalwa uCandy noBusiswa.