Kubhekwe isinqumo kwelabe-ANC
KUZOCACA namhlanje ngekusasa lobuholi be-ANC KwaZulu-Natal njengoba iNkantolo eNkulu yaseMgungundlovu kulindeleke ikhiphe isinqumo ecaleni elibhekwe ngabomvu.
Ubuholi be-ANC obuholwa nguSihlalo uMnuz Sihle Zikalala buyiswe enkantolo wuhlangothi lukaMnuz Senzo Mchunu owayenguNdunankulu waKwaZuluNatal ngoba lukhala ngokuthi kwaba nomkhonyovu engqungqutheleni ka-2015, okwakhethwa kuyo oZikalala.
Okhulumela uhlangothi lukaMchunu, uMnuz Sthe Mshengu ukuqinisekisile izolo ukuthi isinqumo siyaphuma.
UMshengu uthe banethemba lokuthi sizovuna bona. Ummeli wohlangothi lukaZikalala, u-Advocate Greg Harpur naye ukuqinisekisile ukuthi icala liyangena.
Uthe akafuni ukuqagela ngesinqumo, wathi akulindwe inkantolo. Abameli bazo zombili lezi zinhlangothi bazenzile ezethulo zabo phambi kwamajaji abeholwa yiJaji Durban Durban uPiet Koene.
Ithimba labameli bohlangothi lukaMchunu, eliholwa u-Advocate Griffiths Madonsela lilwa ngokuthi ukuhlala kwaleyo ngqungquthela kwakungekho emthethweni ngoba akuzange kugunyazwe ngu-30%, wamagatsha ombutho.
UMadonsela watshela inkantolo ukuthi ngokomthethosisekelo we-ANC uma ingqungquthela izohlala singakafiki isikhathi kumele igunyazwe ngu-30%, wamagatsha okuyinto engazange yenzeke.
Elinye iphuzu uhlangothi lukaMchunu olulwa ngalo lithi ngesikhathi ingqungquthela isaqhubeka kwaphuma imiphumela kuTwitter efana ncamashi naleyo eyamenyezelwa isiphelile ingqungquthela.
Ephendula izethulo zikaMadonsela, ummeli wohlangothi lukaZikalala, uHarpur wathi akukho okuphambene ngokuhlala kwengqungquthela ngoba yahlala ngesikhathi esifanele.
Wayichitha indaba yemiphumela eyaphuma kuTwitter kusaqhubeka ingqungquthela wathi yayingumbombayi, ayizange iphume kwi-akhawunti ye-ANC.
Izinhlangothi zombili zanxusa ukuthi kwamukelwe isinqumo senkantolo noma ngabe sithini.