Kumiswe omunye uthisha odedela isibhaxu
SEKUPHINDE kwamiswa omunye uthisha ovela kwi-video ebhaxabula umfundi ngepayipi esikoleni saseSikhaleni, Umdlamfe Secondary.
Uthisha ubonakala eshaya abafundi bakhe bamantombazane kuthi omunye uma ebaleka amlande eseyophuma ngomyango amtaxe umzimba wonke.
Akucaci ukuthi i-video yathathwa nini kodwa aboMnyango wezeMfundo KwaZulu-Natal bathe usemisiwe uthisha obonakala kwi-video.
UMnuz Kwazi Mthethwa, okhulumela uNgqongqoshe wezeMfundo KwaZulu-Natal, uMnuz Mthandeni Dlungwane, uthe uthisha usebhalelwe incwadi emumisayo ngenxa yokuthi kade yavalwa induku ezikoleni.
Uthe ungqongqoshe usejube ithimba elikhethekile elizophenya ngalokhu bese kuthathwa ezinye izinyathelo.
Udonse ngendlebe othisha ukuthi bangalokothi bashaye izingane ngoba ziningi izindlela zokuqondisa ubugwegwe kumfundi ngaphandle kokumshaya.
Ukumiswa kukathisha eMdlamfe kungemuva kokumiswa kowesikole saseMlaza, Okumhlophe Secondary, ngo-Agasti 28.
Okwamanje uthisha wasOkumhlophe usahleli ekhaya, ikusasa lakhe lizocaciswa yimiphumela yophenyo.
UMthethwa ugqugquzele abafundi nabazali ukuthi babacebe emnyangweni othisha abasebenzisa induku ngoba lokho kuphambene nomthetho wezemfundo futhi kuyicala elibomvu. Yize othisha bekhuzwa njalo ngokusebenzisa induku kubonakala sengathi abaKwaZulu-Natal abayingeni indaba yokusebenzisa ezinye izindlela zokujezisa abafundi.