Baphi abaholi abantu bebanga nezinja amathumbu?
LUYADABUKISA udaba lwezakhamizi zaseGeorgedale ngaseHammarsdale ezintula ngendlela yokuthi zincamela ukuyobanga nezinja amathumbu ezinkukhu alahlwa ngelinye lamapulazi ezinkukhu asondelene nale ndawo.
La mathumbu asuke elahlwe nezimpaphe negazi emgodini okusho ukuthi bawacosha enenhlabathi.
Abakhulume nephephandaba bathi amathumbu yisona sishebo abaxosha ngaso ikati eziko ngoba abasebenzi, abanye bathembele kwizibonelelo zikahulumeni ezinye zazo sezivalekile.
Kukhona abantu abaneminyaka emihlanu bephila le mpilo njengoba bethi baqala ngo-2012 ukucosha amathumbu yize inkampani iphika ithi lokhu kwenzeke isikhashana ngoba bekunenkinga ngenkampani eqoqa udoti.
Akukhathaleki ukuthi sebenesikhathi esingakanani bekwenza lokhu, okumqoka ukuthi akumele ngabe siyakuvumela ezweni ukuthi kube nabantu abahlupheka ngale ndlela yokuthi bancamela ukubanga nezinja ukudla okusuke kulahliwe.
Ezweni elinothe kangaka akufanele abantu bantule ngendlela yokuthi baze bazidele ngale ndlela.
Aphi amakhansela asendaweni? Baphi osonhlalakahle? Aphi amakholwa? Baphi abantu abakhule eGeorgedale asebephila kahle, basakhumbula nje emuva kube khona abalekelela ngakho emphakathini? Baphi abaholi bedolobha nesifundazwe? Baphi osomabhizinisi basendaweni?
Akukwazi ukuthi bangaphila ngale ndlela futhi balulazeke kanjena kube kukhona abantu ababonayo emphakathini abangashintsha isimo kodwa bangenzi lutho.
Namhlanje eNingizimu Afrika kunabantu abangu-30 million abantulayo yikho lokhu ukuthi sekwathiwa ixoxo nexoxo liyazigxumela. Bonke abantu ngisho nabamabandla bazicabangela bona kuphela.
Into emqoka okufanele izikhulu ziyilungise kulolu daba ukuthola izindlela okungasizwa ngazo lo mphakathi. Ayisukunyelwe ngempela indaba yokwakha amathuba emisebenzi ukuze abantu bezokwazi ukuzinakekela.
Kufanele abanikazi bepulazi bathathelwe izinyathelo zomthetho ngoba indlela abalahla ngayo udoti iwukuphula umthetho nobudedengu.