UKatsande ufisa ukubalwa nezinkakha
UKHONKOLO wesisu seKaizer Chiefs, uWillard Katsande, udalule ukuthi ukudlala kwakhe amahlandla awu-200 kuMakhosi kumenza ukuthi abalwe nezinkakha esezike zayibamba kuleli qembu laseNaturena.
Kusukela efikile kwiChiefs eminyakeni eyisithupha edlule, uKatsande usesebenze nabaqeqeshi abahlukene kodwa akakwazi ukuphuma noyedwa athi uyena owenze umehluko omkhulu kunabanye empilweni nasendleleni adlala ngayo ibhola.
“Bonke abaqeqeshi engisebenze nabo baneqhaza elikhulu abalibambile ekutheni ngigcine ngiwumdlali oseyobalwa nezinkakha kwiChiefs,” kusho uKatsande.
“Ngiyakujabulela ukudlala isikhathi eside kanje kwiChiefs. Iyiqembu elikhulu ngakho akufanele ngisibukele phansi isibusiso sami engisiphiwe uMdali. Ngeke ngiphumule singakayiqedi eka-Evans Rusike (weMaritzburg United) ngoba naye unekhono elingamenza inkakha kwiChiefs. Angadlala imidlalo ewu-200 naye kwiChiefs. Cabanga-ke ukuthi angabe eseshaye amagoli amaningi kanjani.” NgokukaKatsande, inkinga yeChiefs isekuyekeni amathuba iqembu eliwakhayo yingakho ebona kuzobasiza ukuthi aphindele kubaphathi bakhe ukuyobatshela ayesevele ebatshelile khona ukuthi abasayinise uRusike uma befuna ukuphuma ezingxakini. Inkulumo yomdlali waseZimbabwe ofike eNingizimu Afrika ezodlalela i-Ajax Cape Town uyisho emuva kokuthi uBobby Motaung, imenenja yebhola kuMakhosi, ephumele obala ngokuthi ngeke baphumule bengamtholile umgadli ozobaqhululela amagoli masonto wonke.
Nakuba iChiefs ike amataniswa noRusike phambilini kodwa iMaritzburg ayizimisele ngokumdedela. Imile ekutheni akadayisi. Newindi lokushintshana ngabadlali lize lavala elokhu ekhonjwe kwephumayo eqenjini likaFarook Kadodia kodwa kwagcina kungenzekanga lokho. Okwenzekile nje wukuthi uRusike, okhiphe iMamelodi Sundowns kwiMTN 8, uvele wayilula ngeminyaka emibili inkontileka yakhe.
Ekhuluma neSoca263, i-website elandela bonke abadlali baseZimbabwe emhlabeni wonke, uKatsande ukuvezile ukuthi uyasibona isidingo sokubuyela kuBobby nabanye abaphethe ukuyobakhumbuza ngoRusike (uma ithuba lokumthenga livela).
“Unakho konke esikudingayo kwiChiefs,” usho kanje uKatsande ngaphambi komdlalo wakhe ka-200 kwiChiefs ezobe ivakashele iCape Town City kowe-Absa Premiership, eCape Town Stadium, eKapa, kusasa ngo-7.30 ebusuku.