Ukubaluleka kokugomela isimungumungwane
UKUBHEDUKA kwesifo ezivame ezinganeni, isimungumungwane KwaZulu-Natal kukhombisa ukubaluleka kokuqiniseka ukuthi izingane ziyagonyelwa izifo ezingavikeleka.
Isikhungo iNational Institute for Communicable Diseases (NICD) sekuqinisekisile ukusabalala kwalesi sifo, sathi sekufinyelele emazingeni aphezulu njengoba zilinganiselwa ku-23 izigameko eziqinisekisiwe zalesi sifo ezindaweni ezahlukene esifundazweni.
Ngokusho komnyango, izigameko seziqinisekisiwe ezifundeni zine kwezingu-11 eThekwini (14), eMgungundlovu (6), iLembe (2), uThukela (1).
Inhlangano yezempilo emhlabeni wonke, iWorld Health Organisation (WHO) ithi isimungumungwane singezinye zezifo ezisabalala ngokushesha ezisuleleka kalula.
Lesi sifo sithelelana ngoketshezi olutholakala emlonyeni, emphinjeni nasemakhaleni omuntu onaso.
Ngokusho kwabe-WHO ayikho imishanguzo eyenzelwe isimungumungwane. Isikhathi esiningi abantu esisuke sibangenile bayasinda emuva kwamasonto amabili kuya kwamathathu.
Noma kunjalo baveza ukuthi lesi sifo singadala izinkinga eziningi okubalwa kuzo ukungaboni, ubuhlungu bekhanda obudala ukudideka komqondo, ukukhishwa yisisu nokunye.
Abe-WHO bathi ayikho indlela eyaziwayo yokuvikela lesi sifo ngaphandle kokugoma izingane.
Esitatimendeni, uNksz Nombuso Shabalala okhulumela iNICD, uthe iningi lezingane ezitholakale zinesimungumungwane zineminyaka engaphezu kwemihlanu – okusho ukuthi bezingeyona ingxenye yomkhankaso wakamuva (2017) woMnyango wezeMpilo wokugomela lesi sifo.
Uthe phezu kwalokhu zivela emphakathini evame ukungakwamukeli ukugonywa kwezingane ngenxa yezizathu ezahlukene, okubalwa kuzo ezenkolo.
“Amathimba abhekana nokubheduka kwezifo amatasa azama ukubhekana nalesi simo. Amathimba asesifundazweni nasezifundeni asehlangene kumanje selukhona uhlelo olwenziwayo, okubalwa kulo ukusatshalaliswa komkhankaso wokugoma. Kunemihlangano eyenziwa nemiphakathi ukusabalalisa iminingwane (ngokubaluleka kokugomela lesi sifo),” kusho uNksz Shabalala.
Unxuse umphakathi ukuthi ukusukumele ukuqinisekisa ukuthi izingane ziyagoma.
Unxenxe nabasebenzi bezempilo ukuthi bahlale beqaphile, basheshe bazibone izingane ezifika zinezimpawu zesimungumungwane.
Uthe abasebenzi bezempilo kufanele babikele izifunda ngabo bonke abasolwa ngokuthi banalesi sifo ukuze kuphenywe ngokufanele.
Ngokusho kwakhe nezikhungo ezihlola igazi ezizimele sezivumile ukuthi zizodlulisela igazi labahlolelwa isimungumungwane kwabeNICD,
Ukubheduka kwesimungumungwane eKZN akukona okokuqala kulo nyaka eNingizimu Afrika.
Ekuqaleni konyaka lesi sifo sibheduke ezifundazweni ezimbili, iWestern Cape neGauteng (17). Ngokwemibiko yabezindaba kube nemithonseyana ebikiwe nakwezinye izifundazwe, okubalwa kuzo iLimpopo neMpumalanga.
UNksz Shabalala uthe kube nokukhathazeka kwamanye amalungu omphakathi akhohliwe ngokusetshenziswa kwesithako esaziwa nge-porcine gelatin emgomeni wesimungumungwane.
Uthe umgomo osetshenziswa kuleli iMeasBio okuyiwona wodwa okhona okwamanje unalesi sithako.
Owawukhona phamabilini, iRouvax yayingenaso lesi sithako kodwa awusakhiqizwa.
Uthe ukhona omunye umgomo osetshenziselwa ukugomela izifo okubalwa kuzo isimungumungwane, uzagiga (mumps) nokunye obizwa ngePriorix kodwa kona kutholakala ezikhungweni ezizimele.
UNksz Shabalala unxuse abasebenzi bezempilo ukuthi bagqugquzele abanezikhalo ngenxa yovalo lwezinkinga abakholwa ukuthi zingadalwa imishanguzo yokugoma, ngokubatshela ngemiphumela emihle ebangwa ukugoma.
Baphinde babatshengise imiyalezo yokweseka ukugoma evela kubaholi bezenkolo, okubalwa kubo abenkolo yamaSulumane.
Izimpawu zesimungumungwane:
Izimpawu zaso azisheshe zibonakale emuva kokuthi sesingenile kodwa zithatha isikhathi, zize ziqale ukubonakala emuva kwezinsuku ezingu-10 kuya kwezingu-12.
ukuba nemfiva (ishise kakhulu ijuluke) ukukhishwa yisisu ukuphuma amafinyila emakhaleni, uba namehlo abomvu, amabala amhlophe aba ngaphakathi emlonyeni.
Emuva kwezinsuku sekuvele lezo zimpawu kuqhubeka kuvele amaqhuqhuva amancane, aqale ebusweni, adlulele emqaleni bese evela umzimba wonke.