Basola uMalema ngokufuna udumo kushona uMagaqa

I-ANC Youth League isola umholi we-EFF uMnuz Julius Malema ngokusebenzisa ukufa kowayenguNobhala we-ANCYL uMnuz Sindiso Magaqa ukuthola udumo.

UMalema ugxekwa emuva kokuthi eveze ukuthi uMagaqa wayehlela ukujoyina i-EFF ngoJulayi 13 okuwusuku adutshulwa ngalo.

UMaqaga ngumholi wesine ukudutshulwa eMzimkhulu. Wadutshulwa ehamba namakhansela amabili okungoNksz Nonsikelelo Mafa noNksz Jabu Mzizi ngaphandle kwesitolo esisendaweni yase-Ibisi, eMzimkhulu.

Kuzoba nenkonzo yesikhumbuzo kaMagaqa ngoLwesithathu eNyuvesi yaseJohannesburg, eSoweto, nenye ezoba seMzimkhulu enkundleni yemidlalo iBhisa ngoLwesine.

UNobhala Jikelele we-ANCYL, uMnuz Njabulo Nzuza, uthe bayibonile inkulumo kaMalema enganambithisiseki ngoba usebenzisa ukufa ukuzakhela udumo.

“UMalema usebenzisa ukufa ukuzakhela udumo. Akakhulumi iqiniso ngoba siyazi uMagaqa ubeyithanda i-ANC futhi ubengeke aye kwelinye iqembu. Yimbi le nto eyenziwa nguMalema,” kusho uNzuza. Uthe bazosivikela isithunzi sikaMagaqa futhi ngeke bavumele osomathuba abafana noMalema ukuthi basebenzise ukufa kwakhe ukuzakhela udumo.

“Amaphoyisa kufanele enze konke okusemandleni ukubopha ababulali bakaMagaqa,” kusho uNzuza.

UMnuz Vuma Magaqa, okhulumela umndeni wakwaMagaqa, akazange asho ukuthi uMalema ukhona ohlelweni lwabantu abazokhuluma emngcwabeni kodwa uthe bamatasa nezinhlelo zomngcwabo.