UNdongeni nethemba lokudlisa kuMayweather
UMSHAYISIBHAKELA waseNingizimu Afrika uXolisani “Nomeva” Ndongeni, unethemba lokuthatha iso lengqwele yomhlaba uFloyd “Money” Mayweather onesitebele iMayweather Promotions ehlela izimpi ezisezingeni eliphezulu.
Namuhla, uNdongeni obengumpetha we-International Boxing Organisation (IBO) lightweight, uphikelele e-US lapho eyozama khona amathuba okuqhakaza esibhakeleni somhlaba. Emasontweni edlule usayine inkontileka nemenenja ezinze e-USA, uLuis Tipia, obuye abe ngumqeqeshi wabashayisibhakela. Abanye babashayisibhakela bakaTipia baqeqeshwa ejimini kaMayweather bahlelelwe izimpi yiMayweather Promotions.
UNdongeni, ongayazi induku ezimpini ezingu-22 kusukela aqala isibhakela, kade enzelwe umcimbi wokumvalelisa e-East London ngeSonto emini. Umcimbi ubuhanjelwe nangosopolitiki kukhona kubona uMatthews Phosa. Emasontweni adlule uNdongeni unqamule ubudlelwano bakhe neGolden Gloves Promotions kaRodney Berman ngenxa yokungagculiseki ngokuhlelelwa izimpi.
“Ngasuka e-East London ngabheka eGoli ngoba ngethemba ukuthi izinto zizoshintsha ngithole izimpi kodwa akwenzekanga ngendlela engangihlele ngayo. Manje sengibheke e-US nakhona nginethemba. Engikufunayo ukungena eringini ngilwe. Ithemba angililahlile,” kusho uNdongeni.
“Ngiyafisa futhi ngiyethemba ukuthi ngizohlangana noMayweather, abuke izimpi zami. Lokho kungaholela ekutheni angifake kwezinye izimpi zakhe. Engikudingayo wukuwina.”
UNdongeni ulwe okokuqala e-USA nyakenye, wahlula ngamaphuzu uJuan Garcia Mendez. Lokhu kwenze wanyukelwa yithemba lokuthi uzothola izimpi zezicoco ezinkulu emhlabeni kodwa kugcine kungenzekanga. UNdongeni angahle ahambe ezinyathelweni zikaChris “The Heat” van Heerden owayengumpetha we-IBO welteweight owafulathela iNingizimu Afrika eminyakeni edlule kodwa wadonsa kanzima ukuthola izimpi.
“Ngaphambi kokuthi siqale yonke into noTipia sizohlala phansi sikhulume. Ngeke ngihambe indawo engaka ngiyosiza abanye abashayisibhakela. Ngifuna ukulwa,” kusho uNdongeni.
“Ngeke ngizifanise noVan Heerden ngoba asazi ukuthi uhlelo lwakhe luthini, asisazi nesivumelwano asebenzela phezu kwaso.”