‘ISilo asilethe izikhalo zaso kuxoxwe’
ISABC isinxuse iSilo samabandla, uZwelithini kaBhekuzulu, ukuthi uma kukhona izikhalo esinazo ngomsakazo uKhozi FM sizilethe ukuze bazicubungule.
Lokhu kushiwo okhulumela umsakazo womphakathi, uKaizer Kganyago.
Odabeni olushicilelwe yiSolezwe ngoMsombuluko iSilo sikhale ngokuthi uKhozi FM lubulala ulimi lwesiZulu. Siphinde sakhala kakhulu ngokushintshwa kwegama iRadio Zulu ibizwe ngoKhozi FM.
UKganyago uthe ngeke baqophisane ngamazwi kwabezindaba noNgangezwe lakhe kodwa bayanxusa ukuthi aveze izikhalo kubo.
“Siyacela iMbube isazise ngengeneme ngakho sibheke ukuthi kungalungiswa kanjani.
“Kodwa singakusho nje ukuthi amagama emisakazo eminingi ashintsha kudala, nelikaRadio Zulu lashintsha ngaleso sikhathi,” kusho Kganyago.
Bekungekona okokuqala iSilo siveza ukungenami kwaso ngendlela umsakazo womphakathi owashintsha ngayo igama.
Ngesikhathi sigubha usuku lokuzalwa esigodlweni KwaLinduzulu, KwaNongoma, iSilo sathi asazi ngempela ukuthi kwakwenzenjani kuze kushintshwe igama.
Saveza ukuthi kumele ixoxwe le ndaba sithole ukuthi kwakwenzenjani kuze kuthiwe alishintshwe igama ngoba isizwe samaZulu sisekhona kanti neSilo sawo sikhona.
Okhulumela iNdlunkulu, uMntwana uThulani Zulu, uthe bebengakazidluliseli izikhalo eSABC kodwa ngoba ngabantu abajwayele ukuba nemihlangano nabo bazoluxoxa lolu daba.