Baqhubekela phambili nokujezisa uKhoza
NAKUBA inkantolo yaseMgungundlovu ichithe ubuholi be-ANC esifundazweni obakhethwa ngo-2015 njengento engekho kodwa amanye amalungu esigungu esiphezulu esifundazweni athe uzoqhubeka nokuqondisa ubugwegwe uDkt Makhosi Khoza ngeSonto.
UKhoza ubhekene namacala okudicilela phansi i-ANC ngokukhuluma esidlangaleni, agxibhe le nhlangano nokusho izinto ezilumelayo ngabanye abaholi bayo.
Esithangamini sabezindaba izolo, uMnuz Kwazi Mshengu, onguSihlalo we-ANC Youth League esifundazweni obefunda isitatimende esibhalwe ngokuhlanganyela salolu phiko nolwabesifazane, uthe “Siyaqhubeka isigungu sokumqondisa ubugwegwe. Sizoba abangani benkantolo kulolu daba (amicus curiae) lokuqondiswa ubugwegwe,” kusho uMshengu.
Ngemuva kokukhishwa kwesinqumo ngoLwesibili sokuchitha ubuholi obakhethwa, uDkt Khoza uthe kade ayesho ukuthi abantu abamuthwesa amacala indaba yabo ayicacile njengoba bechithwe nayinkantolo. Ekhuluma kwiMorning Live izolo ekuseni, uSihlalo we-ANC esifundazweni uMnuz Sihle Zikalala uthe: “Njengoba sinqume ukuthi sidlulise icala, ukuqondiswa kwakhe ubugwegwe kuyaqhubeka. Ukuqondiswa kwakhe ubugwegwe kwenziwa ikomiti elibhekele lokhu. Isinqumo senkantolo asinamthelela endabeni yokuqondiswa kwakhe (uKhoza) ubugwegwe.”
Ekhasini lakhe kuFacebook, uKhoza ubonge ukwesekwa wathi yisikhathi sokuthi aphefumule, azihlole.
“Ngiyaxolisa ngeke ngiphendule mibuzo. Ngivumeleni ukuthi ngiphumule.
Ngizobuya. Nginithanda nonke,” kusho uDkt Khoza.