UHolomisa ufuna i-DA ixolise ngolukaBobani
UMENGAMELI we-UDM uJenene Bantu Holomisa ufuna isixoliso kumholi weDA uMnuz Mmusi Maimane ngodaba lokuxoshwa kukaMnuz Mongameli Bobani obeyiPhini leMeya kuMasipala waseNelson Mandela Bay.
Encwadini ayibhalele i-DA, uHolomisa uthe akayiqondi indaba yokukhishwa kukaBobani ngoba ayizange ibazise ngokwenzekayo.
“I-DA isebenzise umbiko ongakakhishelwa umphakathi yase iphasisa ivoti lokungamethembi uBobani.
“Ayikaze isazise ngezinsolo ezibhekiswe kuBobani iDA njengabantu esisebenzisana nabo kuhulumeni wobambiswano.
“Ivele yathi ayisamethembi nje kwaphela uBobani,” kusho uHolomisa.
Ubuze ukuthi uMaimane ubekuphi ngesikhathi kuxoshwa uBobabi futhi kungani engangenelelanga kulolu daba.
Uthe ufuna iDA ixolise ngalesi senzo ngoba kufana nokuthi ivote ne-ANC yangabambisana ne-UDM ababambisene nayo kuhulumeni wobambiswano.
“Niwukhohlisile umphakathi baholi be-DA.
“Sifuna nisihoxise isinqumo senu ngoba sikhombisa ukuthi ninamanga futhi nisebenzisana ne-ANC yize ninesivumelwano nathi,” kusho uHolomisa.
Incwadi uphinde wayidlulisela kumholi we-ACDP uRev Kenneth Meshoe, umholi weCope uMnuz Mosiuoa Lekota noweFreedom Front Plus uDkt Pieter Groenewald.
Umkhulumeli kaMaimane uNksz Portia Adams, uthe bazoyibhekisisa incwadi ngoba isithunyelwe kuMnuz James Selfe.
Ucingo lukaSelfe lukhale lwangabanjwa kanti akayiphendulanga nemibuzo athunyelelwe yona nge-SMS.