Kunzima enganeni ekhukhumele ikhanda
IPHILA kanzima ingane yaKwaMashu, kwa-E engakwazi ukuhamba ngenxa yokukhukhumalelwa yikhanda unina owatshelwa ukuthi inamanzi ekhanda ngesikhathi izalwa.
Unina wale ngane, uNkz Philile Mhlongo uthe ingane yakhe, uNonhlanhla Mtshali (7) yazalwa inamanzi ekhanda, livuvukele.
Kumanje ingane yakhe ayikwazi ukuhamba nokukhuluma kahle, ihlale ilele. Ingane yakhe iphila impilo yengane esanda kuzalwa ngoba yenzelwa yonke into, iyafunzwa, igqokiswe, igezwe. Okwenza kube nzima kakhulu ukuthi ihambe wukuthi ikhanda layo likhukhumele ngokungajwayelekile. Uthe ngenxa yesimo sayo uphoqeleke ukuthi ashiye umsebenzi ukuze ayinakekele esekhaya.
UNksz Mhlongo uthe kumanje ingane ayinaso isihlalo esihamba ngamasondo esiyivumela ukuthi ikwazi ukuncikisa ikhanda.
“Noma ngihamba naye kufanele ngiqashe izihlalo ezintathu etekisini ngoba akakwazi ukuhlala ngesinqe. Ikhanda lakhe liyamsinda,” kusho uNksz Mhlongo.
Uthe ingane yakhe izalelwe esibhedlela iKing Edward VIII okuyilapho okuqale khona ukuthi kubonakale ukuthi inenkinga.
“Ngesikhathi ngikhulelwe ngangizwa ukuthi kukhona into engalungile kahle enganeni ngoba isisu sami sasisinda ngokweqile. Bengingaqali ukuthola umntwana ngakho kwaba lula ukuthi ngibone ukuthi lokhu okwenzeka enganeni akujwayelekile. Ngenxa yokuthi ingane yayiyibhriji nodokotela abazange babone ukuthi ikhanda layo livuvukele ngokweqile nokuthi inamanzi ekhanda. Lokhu kuze kwabonakala ngoba seyizelwe,” kusho uNksz Mhlongo. Izolo, iMeya yeTheku uNkk Zandile Gumede iye kobona uNksz Mhlongo nendodakazi yakhe ngoba ifuna ukubona isimo sayo. UNkk Gumede uthe basibonile isimo esinzima ephila ngaphansi kwaso ingane. Uthe abafuna ukukuphuthumisa wukuthi ithole isihlalo esihamba ngamasondo esisezingeni elidingekayo kumuntu osesimeni sayo – esizoyisekela nasekhanda uma ihleli.
Uphinde wathi bafuna ukubatholela indawo yokuhlala ngoba bahlala endlini eyigumbi elilodwa. Le ngane ize yangenwa yisifo sofuba ithelelwa enye ingane ehlala endlini engumakhelwane ngenxa yokwakheka kwendlu abahleli kuyo. Uthe bafuna nokuthola onompilo abazosizana nonina wengane ukuze ithole usizo eludingayo.