Bavale umgwaqo belwela owezinyoka
ATHUKUTHELE avala zonke izintuba ezingena edolobheni iKranskop ngamathayi avuthayo nangemfucuza, amalungu omphakathi abekhala ngokunqanyulwa kukagesi wezinyokanyoka okuthiwa usubulale abantu abathathu abahlala emijondolo yase-19 eyakhele idolobha.
Izolo, uMnuz Nkosinamthi Dladla osekomitini lomphakathi ku-ward 5 ngaphansi kukamasipala uMvoti, uthe amalungu omphakathi avuke izintathakusa avala umgwaqo ecikwa wukunqanyulwa kukagesi wezinyokanyoka ngumasipala. Uthe abantu badinwe kakhulu yizethembiso zokufakelwa ugesi ezingafezwa.
“Siyazi ukuthi ugesi wezinyokanyoka uyingozi futhi bakhona osubabulele. Kodwa umphakathi ubuthembele kuwo ukuthi ukwazi ukukhanyisa nokwenza ezinye izinto. Nathi besingawufuni lo gesi futhi bese sizame kaningi ukuba nemihlangano nekhansela ukuze sifake isicelo sokuthi sifakelwe ugesi kodwa kuze kube manje asinawo,” kusho uDladla.
Uthe abahlala kule mijondolo yase-19, badonsa ugesi ezigujini ezazifakelwe amasosha kudala ngesikhathi kunekhempu. Uthi ngaphandle kukagesi abakhala ngawo okhishwe wumasipala ngoMsombuluko, lo mphakathi ucasulwe wukulindiswa umnyama ongenafu njengoba wathenjiswa ukwakhelwa izindlu ezingu-500 okwathiwa zizokwakhiwa ngo-2002 kodwa kuze kube manje azikakhiwa.
UMnuz Bongani Mkhize oyilungu lomphakathi usole ikhansela uMnuz Mbangiseni Yengwa ngokungazinaki izikhalo zabahlala ewadini ayiphethe.
“Okubuhlungu kakhulu wukuthi uYengwa uhlala ku-ward 4 ekubeni ephethe ku-ward 5. Lokhu kumenza angasikhathaleli thina ngoba okusithintayo akumthinti kangako. Kwesinye isikhathi uma efonelwa ukuze azozwa izikhalo zabantu akezi, noma azibe ucingo angalubambi,” kusho uMkhize.
USomlomo kumasipala waseMvoti, uMnuz Wilson Khoza ogcine efikile ukuzozwa izikhalo zomphakathi uthe ubunzima umasipala obhekene nabo ngodaba lokufaka ugesi kule mijondolo wukuthi u-Eskom ufuna ukunikezwa isiqiniseko sokuthi uma befakelwa ugesi, ngeke besasuswa kule ndawo.
“Ukuntshontsha kwabo ugesi kuholelele ekutheni kuqhume i-transformer. U-Eskom awunankinga nokufaka ugesi kodwa inkinga ngeke siqinisekise ukuthi ngeke besasuswa kule ndawo ngoba kuzoba nezikhathi uma sekumele bakhelwe izindlu zikahulumeni. Okuyinkinga ngokuthi bangakhelwa izindlu okwamanje wukuthi iKranskop yidolobha ngakho ukwakhiwa kwezindlu kumele kubhekelwe izindlela zokuthuthwa kwendle ngoba izindlu zasedolobheni kumele zibe namathoyilethi ashaywayo,” kusho uKhoza.
Uthe uhlelo lokuthuthwa kwendle, ludinga uhulumeni omkhulu angenelele ngoba isabelo-mali sikamasipala sincane kakhulu ukuthi singamelana nalokho.
Khonamanjalo umphakathi waseCliffdale ngoLwesibili uvale umgwaqo ukhala ngokuphucwa ugesi obuxhunywe ngokungemthetho okuthiwa ngeSonto ushaye ingane eneminyaka eemihlanu, yashona.