I-Cosatu imashela imisebenzi nokudliwa kombuso busululu
UMFELANDAWONYE wezinyunyana iCosatu uhlela ukhukhulelangoqo wemashi yokulwa nokuphela kwemisebenzi, ama-labour brokers nokuphathwa kombuso yidlanzana.
Lezi zindaba zivezwe ngumgqugquzeli weCosatu KwaZulu-Natal, uMnuz Edwin Mkhize (osesithombeni) ngoLwesibili.
“Sifake isicelo sokumasha ngoSepthemba 27 ngoba sikhathele wukubona abasebenzi bedilizwa. Sifuna kuphele ama-labour brokers nokuthi kuqedwe umkhuba wokusetshenziswa kombuso yidlanzana. Sicela abasebenzi baphume ngobuningi babo ukuze uhulumeni abone ukuthi bakhathazekile ngezinto ezenzeka ezweni,” kusho uMkhize.
Uthe bafuna kudalwe amathuba emisebenzi kuliwe nendaba yokumba eqolo kukagesi okwenziwa ngabaphehla ugesi ngokuzimela.
Imashi yaseThekwini izosuka epaki yeSilo uDinizulu noLouis Botha iyophelela eCity Hall.
UMkhize uthe izinhlelo zemashi zihamba kahle ngoba sebezihambise zonke izimfanelo kumasipala futhi bayaqhubeka nokugqugquzela abasebenzi ukuthi baphume ngobuningi ukulwa nezinkinga ezibahluphayo.
“Kubalulekile ukuthi abasebenzi babonakale ngoSepthemba 27 ngoba uma siya ezithangamini zokuxoxa ngezinkinga zabasebenzi uhulumeni ubuye azitshele ukuthi ngumbono weCosatu hhayi owabasebenzi. Uma bebonakala bemasha bezisholo bona ukuthi kubathikameza kanjani ukuqashwa ngama-labour brokers, uhulumeni uzosukumela phezulu,” kusho uMkhize.
Uphethe ngokuthi iCosatu iyaqhubeka nokulwela izidingo zabasebenzi kuleli namaholo angcono kubasebenzi.