I-Essence nezindlela zokuzivocavoca
BAZOFUNDA ngezindlela ezintsha zokuzivocavoca abantu baseThekwini kusuka kule mpelasonto njengoba kulungiselelwa i-Essence Festival.
NgoMgqibelo ithimba losaziwayo elikhonze ukuzivocavoca elihlanganisa uDennis Nzimande, Yolanda Sokhela, Mapule Ndlovu nabanye lizobe liseZinto Cele Park, ekwaD, ngaphesheya kwenkundla yezemidlalo iKing Zwelithini, eMlaza.
UYolanda ngenye yezintokazi ezithathwa njengezinekusasa eliqhakazile kwezokuzivocavoca kwazise ubalwa nabesifazane abahlanu abenza izinto zenzeke yiphephabhuku labesifazane iWomens Health.
Abafisa ukuzivocavoca kufanele bafike ngo-8 ekuseni njengoba kufundiswa ngezindlela ezihlukene zokunakekela umzimba kusuka kuma-aerobics, kick boxing, step dance, pilates, yoga nokunye.
NgoMgqibelo ozayo, ithimba lizoya KwaMashu, enkundleni yezemidlalo ePrincess Magogo liyoqhuba umsebenzi ofanayo.
Esitatimendeni esithunyelwe abophiko lwezokuxhumana kuMasipala weTheku kuthiwa izinkundla zokuzivocavoca zizoqhubeka kuze kube nguSepthemba 30 eNew Beach, lapho kuzobe kukhona uNomzamo Mbatha oyinxusa le-Essence.
Ngaphandle kokuletha osaziwayo ukuthi baqeqeshe abantu abathanda ukuzivocavoca abanikazi bamajimu nabafundisa ukuzivocavoca abangaziwa bathola ithuba lokwaziwa.
Ukuzivocavoca kuvuleleke kubo bonke abantu baseThekwini futhi kungenwa mahhala ezinkundleni zokuzivocavoca ezehlukene.
Abantu bazophinde bafunde nezindlela ezifanele zokudla uma befuna ukuba nemizimba elolongeke kahle.
Bazofundiswa nokuthi kubaluleke ngani ukuzivocavoca nsuku zonke nokuthi yiziphi izifo abazigwemayo uma bekukhuthalela ukunyakazisa umzimba.