Udla izicoco ngezinkondlo
UMANGAZE othisha ngokuba nekhono eliyisimanga lokuhaya izinkondlo umfundi waseKwenzakwethu Primary, KwaSwayimane osedlulele esigabeni sesifundazwe emqhudelwaneni wezobuciko.
USiyamthanda Zondi (10) owenza uGrade 4 kulesi sikole, uthathe izicoco kulandelana ngokuhaya inkondlo esihloko esithi: Albinism.
Namuhla uyoncintisana nabanye emqhudelwaneni wezikole wesifundazwe saKwaZulu-Natal oseCivic Centre, ePort Shepstone.
Uthisha wakhe, uNksz Ncamisile Khoza, uthe selokhu ehleli endaweni yokuqala kusuka kuqala umqhudelwano oqale ngenyanga edlule, ubehlula bonke abafundi bezikole abeqhathwe nabo.
“Uqale ngokuhlula abezikole ezingaphansi kuka-ward 11 KwaSwayimane, wakuphinda lokho ezikoleni kwisekethe. Ukunqoba kwakhe kwisekethe kumbeke ethubeni lokuthi angenele umqhudelwano wesifunda nakhona wadla umhlanganiso. NgoLwesine (namuhla) uyoqhudelana nezikole ezingeni lesifundazwe ePort Shepstone,” kusho uNksz Khoza.
Uthe yize lo mfundi evele ehlakaniphile ekilasini kodwa bebengazitsheli ukuthi unekhono elingaka kwezobuciko. Inkondlo ethi: Albinism, uthe ibhalwe uyena uthisha ngenhloso yokufundisa bonke abafundi ukuhaya kodwa, uSiyamthanda uvele wagqama kwabanye abafundi ngokuyihaya kahle.
Uthe yize inamagama amakhulu esingisi kodwa lokho kuwubala kuSiyamthanda, ngoba amagama uwaphimisa ngendlela.
Uthe uphinde akhombise nokuthi uyakuqonda akushoyo ngoba uze alingise nangezandla.
UNksz Khoza uthe ngisho ehaya le nkondlo exwayisa abantu ukuthi bangababulali abanebala elimhlophe, uSiyamthanda akukho lapho eba namaphutha khona yize inamakhasi amathathu.
Echaza ngempilo yalo mfundi uthe ukhuliswa nguyise yedwa njengoba ashonelwa ngunina esemncane.