UMthalane uzokwehlisa ingcindezi ngowaseGhana
UMPETHA we-International Boxing Organisation (IBO) flyweight, uMoruti “Babyface” Mthalane, uthole ithuba lokwehlisa ingcindezi abhekene nayo yokuthola impi yokuvikela isicoco sakhe ngempi azoyilwa no-Isaac “Pretty Boy Junior” Quaye waseGhana.
Ezinyangeni ezedlule uMthalane ubebalisa ngokuthi unovalo lokuthi i-IBO izomephuca ibhande lakhe ngenxa yokungalivikeli. Ugcine ukungena eringini ngo-Ephreli ehlula ngomngqimuzo womlalisa phansi uGenisis Libranza wasePhilippines empini ebikade iseGauteng.
UMthalane uthe ikhona lakhe libhalele i-IBO liyazisa ukuthi akakayitholi impi yokuvikela ibhande lakhe njengokwemiyalelo yayo kodwa uzolwa impi yemizuliswano ewu-10 no-Isaac “Pretty Boy Junior” Quaye waseGhana ngoSepthemba 24, e-Eldorado Park, eGauteng. Impi izoba ngeyosuku kwezihlelwe yiVictory Promotions.
“Sibhalele i-IBO sayazisa ukuthi okwamanje sizolwa impi yemizuliswano ewu-10 futhi ayibanga nankinga nalokho. Obekubalulekile wukuthi sibazise ngoba siphethe ibhande labo,” kusho uMthalane.
“Okubaluleke kunakho konke kimina wukungena eringini. Kodwa ngale mpi ngizophinde ngisizakale ngokuthi nginyuke ezilinganisweni nokuzongibeka ethubeni lokulwela amabhande angaphezulu. Ngizilungiselele kakhulu.”
UMthalane, oveze ukuthi usebheke ekusiyekeni isibhakela ngenxa yokwentula izimpi, uveze ukuthi unethemba lokuthola impi yokuvikela ibhande lakhe ngokushesha. Umqeqeshi wakhe, uColin “Nomakanjani” Nathan, uphesheya kwezilwandle lapho ezoba sekhoneni likampetha we-IBO, uHekkie “Hexecutioner” Budler, ozolwa impi ehlanganisa izicoco noMilan Melindo ophethe ele-International Boxing Federation (IBF) light flyweight. Impi izoba ngoMgqibelo emini. UMthalane ubhekwe ngeso lokhozi yiphini likaNathan, uVusi Mtolo waKwaZuluNatal.
UQuaye (30-12-1) ungumpetha weGhanaian flyweight nayiwine ngoMeyi ehlula ngomcacamezelo womlalisa phansi u-Albert Commey. Ezimpini eziyisishiyagalolunye azilwe ngaphandle kwaseGhana, akakaze awine neyodwa.
“UNathan uzobuya ngoMsombuluko, okwamanje sisebenza noVusi. Kodwa lokho akungiphazamisi ngalutho ngoba uhambe sesivele siwenzilwe umsebenzi. Akukho engingakhala ngakho ngamalungiselelo,” kusho uMthalane.
“Ayikho impi engiyithatha kancane, ngizimisela ngendlela efanayo. Akukhathalekile ukuthi ngilwela ibhande noma cha.”