Uxoshiwe okhala ngomuthi eqenjini
UKHONJWE indlela umdlali weMbombela, uLucky Mathonsi, ocebe leli qembu kwiSouth Africa Football Player’s Union (Safpu) ukuthi lisebenzisa umuthi.
Lezi zindaba zitshelwe Isolezwe yiphini likasihlalo weSapfu, uTebogo Monyai izolo ekuseni. Leli phephandaba like labika ngodaba lweMbombela ebisolwa ngokuphoqa abadlali ukuthi basebenzise umuthi.
ISafpu yadalula ukuthi leli qembu liye esangomeni eMozambique lapho abadlali bafike bagcatshwa khona.
“ULucky ukhonjwe indlela. Ubizelwe ekomitini eliqondisa ubugwegwe ngaphakathi eqenjini. Iqembu likhale ngokuthi udicilele phansi isithunzi salo ngokubikela iSafpu ngodaba lokuphoqwa kwabadlali ukuthi basebenzise umuthi. Imithetho yabasebenzi eNingizimu Afrika ivumela wonke umuntu ukuthi amelwe yinhlangano yabasebenzi.
“ULucky akazange ayikhulume kwabezindaba le ndaba yomuthi kodwa wayikhuluma kithina okuyinto anelungelo layo. Ekomitini eliqondisa ubugwegwe kwakunofakazi ababili ohlangothini lweqembu noyedwa ohlangothini lukaLucky. Ufakazi kaLucky uyasho ukuthi baphoqwa ukuthi basebenzise umuthi. Umdlali unikwe izinsuku eziyisikhombisa ukuthi aphikise isinqumo seqembu. Ngeke asiphikise, kunalokho udaba silidlulisela kwiPremier Soccer League Dispute Resolution Chamber,” kusho uMonyai.
Leli phephandaba liphinde lahabula izindaba ezithi uMathonsi ubengabhalisiwe ngaphansi kwePSL.
“UMathonsi siphinde sathola ukuthi ubengabhalisiwe kwiPSL yize esayine inkontileka neMbombela. Lokhu kusho ukuthi yize lolu daba lusaqhubeka kodwa usengalithola iqembu elisha ngoba alisekho iqembu aqashwe kulona. Thina sifuna ubulungiswa. Asikwazi ukuthi sivumele amaqembu ukuthi aphoqe abadlali basebenzise umuthi. Njengoba sasishilo ukuthi basabisa abadlali ngokuthi bazonqamula izinkontileka zabo, lokho sizolwa nakho,” kusho uMonyai.
Usihlalo weMbombela United, u-Oupa Matsebula uvumile ukuthi bayawusebenzisa umuthi eqenjini.
“Angazi ngempela liqhamuka kuphi ihaba elingaka. Usiko, siyakwenza lokho eqenjini njalo ngaphambi kokuthi kuqale isizini.
Amaqembu anezindlela zawo zokwenza usiko. Nathi umuthi siyawusebenzisa, abadlali siyabachazela ngalokhu.
ULucky simxoshile ngemuva kokulahlwa yicala. Simnike izinsuku eziyisikhombisa zokuthi aphikise isinqumo sethu uma ethanda.
“Uma ethatha isinqumo sokulidlulisela kwiDRC lolu daba asinankinga ngoba lelo yilungelo lakhe. Lapha sinendlela esenza ngayo izinto. Uma ungeneme ngento ethize kumele usibhalele ngokungenami kwakho. ULucky akakaze akwenze lokho. Wavele waqonda kwiSafpu,” kusho uMatsebula.
Nokho ukucacisile ukuthi umdlali abamchazelanga ngaphambi kokusayina ukuthi basebenzisa umuthi.