Kuzovuka amagqubu koweCity neSuperSport
KUZOVUKA amagqubu emdlalweni wamanqamu weMTN 8 uma sekutholene phezulu iCape Town City neSuperSport United.
IPremier Soccer League (PSL) izoyimemezela namuhla ngo-7 ebusuku inkundla okuzodlalelwa kuyona umdlalo wamanqamu kodwa sekuyaziwa ukuthi ungo-Okthoba 14. Kuvele ukuthi iPSL izozama ukuyisa umdlalo enkundleni encane ngoba amaqembu azobe edlala awanabo abalandeli abaningi. Enye yezinkundla engase ibhekwe yiSusa Dukashe e-East London, e-Eastern Cape.
Kulo mdlalo kuzovuka amagqubu. Umqeqeshi weSuperSport u-Eric Tinkler uzotholana phezulu neqembu lakhe elidala iCape Town City.
AmaCitizen yiwona atakule uTinkler ngemuva kokuchithwa yi-Orlando Pirates ekuqaleni kwesizini edlule. Kuleli qembu unqobe iTelkom Knockout. Akagcinanga lapho kwazise uthathe iqembu walibeka endaweni yesithathu kwiAbsa Premiership. Usihlalo weCape Town City, uJohn Comitis, wasala edumele ngendlela uTinkler ahamba ngayo. Kulo mdlalo uTinkler ubhekene nenselelo yokugila abaphathi bakhe bakudala. Okunye okuzokwenza umdlalo ujiye wukuthi uBenni McCarthy ocija iCape Town City wake watshela uTinkler emakhaleni ukuthi akasoze amehlula ngalutho. Wathi ngisho bangahlanganisa izindondo asebeke bazinqoba benoRoger de Sa nemali ngeke bafike ezingeni lakhe. UMcCarthy wakusho lokhu esadlala kwi-Orlando Pirates ngo-2011 ngemuva kokunqoba isicoco seTelkom Knockout neBucs. Baxebula iBidvest Wits ngo 3-1 eMoses Mabhida Stadium, eThekwini.
UTinkler wayeseyiphini likaRoger de Sa ngaleso sikhathi. UMcCarthy unengcindezi yokuma emazwini akhe okuthi uTinkler akasoze afika ezingeni lakhe ngokuthi awine isicoco sakhe sokuqala.
Kuwona lo mdlalo uSifiso “Nsunda” Myeni uzobhekana noMcCarthy osanda kumchayisa. UMcCarthy waba nomhlangano noMyeni emcela ukuthi azomdlalela kodwa lo mdlali wakhetha ukuyodlalela uTinkler kwiSuperSport.
U-Aubrey Modiba noThato Mokeke bazobhekana namaqembu abebedlala kuwona. Ngesizini edlule uMokeke ubegijima kwiCape Town City abebolekiswe kuyona iSuperSport.
UMokeke ubuyele kuMatsatsantsa a Pitori kule sizini. Unethuba lokugila iqembu elivuselele ikusasa lakhe.
Omunye umdlali ozobe ebhekene neqembu lakhe elidala nguModiba odayiswe yiCape Town City ekuqaleni kwesizini edlule. Lo mdlali oyibamba kwesokunxele emuva ubukeka esofomini enhle kulezi zinsuku.