Uphebeza ingcindezi umgadli waMaZulu otakule ezakhe
UGWEMA ukuzifaka ingcindezi yamagoli umgadli waMaZulu, uMhlengi Cele, otakule iqembu seliyoshona ilanga lidlala ngokulingana neMaritzburg United emdlalweni wabakhaya eKing Zwelithini Stadium, eMlazi, ngoLwesibili ebusuku.
UCele, ongene esiwombeni sesibili, ubeqala ukudlalela Usuthu kusukela esayine ekuqaleni kwesizini esuka kwiThanda Royal Zulu abegijima kuyona kwiNational First Division (NFD) ngesizini edlule. Ungomunye wabagadli abashise umbango wesicoco somshayimagoli ovelele iTop Goal Scorer Award ngesizini edlule ogcine udliwe nguSedwyn George osegijima kwi-Ajax Cape Town. UCele ugcine eshaye amagoli angu-15 asize iThanda yawina iligi yeNFD.
“Kuyangikhuthaza ukushaya igoli njengomdlali ngoba wumdlalo wami wokuqala. Kusho ukwenyuka kokuzethemba emdlalweni olandelayo. Angizibekele umgomo omkhulu. Wukuthi ngifuna ukushaya amagoli amaningi kunalawo engiwashaye kwiThanda,” kusho uCele.
AmaZulu anamaphuzu amane emuva kwemidlalo emithathu. Asawine umdlalo owodwa obekungowokuqala neFree State Stars, akhala ngaphansi kwiChippa United. Usuthu lusashaye amagoli amabili kuphela, lwangenelwa amathathu. Kubhekwe lukhulu kumqeqeshi uCavin Johnson othake iqembu lakhe ngabadlali abasebancane nabanamava nothenjwe ngomsebenzi wokugcina leli qembu kwiPremiership nangesizini ezayo.
Usuthu luzodlala omunye wabakhaya neLamontville Golden Arrows kowePremiership ePrincess Magogo Stadium. KwaMashu, ngeSonto ngo-3 ntambama.
UCele usebuya okwesibili kwiPremiership kwazise ngamasizini edlule usayiniswe yiChippa kodwa waphenduka ukudla kwebhentshi okwenze angabonakala amagalelo akhe. “Kuqala ngabulalwa wukuthola ithuba, nganginganikwa lona. Manje umqeqeshi uyethembisa ukuthi uzonginika ithuba. Ngicabanga ukuthi ngizokwazi ukushaya amagoli njengoba kade ngenza kwiThanda,” kusho uCele.
“Umdlalo wabakhaya baseKZN uhlale unzima, sonke siyalwa. Asizimisele ukudedela amaphuzu. Ngiyazi abalandeli sibaphoxile ngokudlala ngokulingana koweMaritzburg ekhaya. Angiyicabangi nakancane eyokugawulwa yizembe kulaba badlali esinabo nomqeqeshi esinaye.”