Uzofa esiqeshini uDumi Masilela kuRhythm City
INDLELA adutshulwa wabulawa ngayo umlingisi weRhythm City, uDumi Masilela, iyona azophuma ngayo kulo mdlalo, njengoba indawo ayilingisayo isizofinyelela emaphethelweni.
Lokhu kudalulwe uphrojusa walo mdlalo uYula Quinn.
Uthe babone kungcono bahlangane nomndeni kaDumi, bakhulume ngendlela azophuma ngayo kulo mdlalo.
“Sihlale phansi nomndeni kaDumi sicela ukuthi kunganjani indawo kaSfiso siyiqede ngendlela adlula ngayo emhlabeni. Umndeni awuyibonanga inkinga uvumele phezulu,” kuchaza uYula.
Uthe bathathe lesi sinqumo ngenxa yokuthi bafuna ukuqwashisa ngobugebengu obuthe chithi saka kuleli.
“Esiqeshini sokugcina azobonakala kuso, ngeke kuvele indlela adunwa ngayo imoto kodwa kuzofika uShakes ezobika ngalesi sigameko.
“Sibonga ngempela emndenini wakhe ngokusivumela sisebenzise lo mcabango obuhlungu owabehlela ngesikhathi kuhlaselwa uDumi,” kuchaza yena. Uthe uDumi uzobonakala okokugcina kulo mdlalo ngoOkthoba 11.
“Okunye okuzobonakala kuRhythm City yinkonzo yakhe yesikhumbuzo ezokwenziwa ngokomdlalo kodwa unina omzalayo, uMagdeline Masilela, nomfowabo uThabani bazoba yingxenye yesikhumbuzo,” kuchaza yena. Uthe inkonzo yesikhumbuzo bazoyikhombisa kulo mdlalo ngo-Okthoba 18.
“Ukukhombisa lokhu okwenzeka sicabanga ukuthi yikhona okuzokhombisa ukuthi umdlalo iRhythm City ilahlekelwe kangakanani futhi uDumi uyohlala ekhona ezinhliziyweni zethu ngaso sonke isikhathi,” kuchaza yena.
UDumi wadutshulwa elokishini akhulele kulo iTembisa, ngo-Agasti ngabalisa okusolakala ukuthi babefuna ukuthatha imoto yakhe.
Kulesi sigameko wayehamba nomngani wakhe. UDumi washonela esibhedlela nokuyisehlo esathinta abantu abaningi kuleli.
Engakangcwatshwa lo mlingisi kwaboshwa abalisa ababili nokuthe emasontweni edlule kwaboshwa omunye wesithathu.
UDumi ubeshade noSimphiwe Ngema owayelingisa kuMuvhango.