I-SAA izotakulwa ngoR10 billion

UNGQONGQOSHE ehhovisi likaMengameli uMnuz Jeff Radebe uthe iSAA izotakulwa ngoR10 billion.

URadebe usho lokhu emuva kokuthi iPhini likaMengameli uMnuz Cyril Ramaphosa liqinisekise amalungu ePhalamende ngoLwesithathu ukuthi iSAA izotakulwa.

URadebe ubephendula imibuzo ye-EFF ebifuna ukwazi ukuthi ngabe iSAA izophinde itakulwe njengenhlalayenza yini.

“I-SAA izotakulwa ngoR10 billion kodwa umuntu ozochaza kabanzi ngalolu hlelo nguNgqongqoshe wezeziMali uMnuz Malusi Gigaba emasontweni ezayo,” kusho uRadebe.

UMqondisi woMnyango wezeziMali uMnuz Dondo Mogajane ukuqinisekisile ukuthi iSAA izosizwa kungakapheli inyanga.

I-SAA idinga ukukhokhela amabhange ewakweleta uR6.8 billion kungakapheli inyanga.

Akuqali ukuthi iSAA ibe senkingeni yezimali kwazise kule minyaka engu-10 edlule isitakulwe ngoR20 billion nguhulumeni.

Kuke kwazwakala ukuthi uhulumeni ufuna ukudayisa amasheya akhe ka-39% kwaTelkom ukuze athole uR13 billion ozosiza iSAA.

Amaqembu aphikisayo awaneme ngalezi zindaba njengoba ilungu leDA uMnuz Chris Hattingh ethe akufanele uhulumeni alokhu esiza izinkampani ezihluleka wukuphatha imali.

UNksz Nkagisang Koni we-EFF uthe izinkampani azinamali ngenxa yomndeni wakwaGupta obuzenzela umathanda.

URadebe uthe uhulumeni ngeke agcine ngokutakula izinkampani zakhe ezingenzi kahle kodwa uzoqapha isimo ngeso lokhozi ukuqinisekisa ukuthi imali iphathwa kahle.