I-ANC ayihoxise icala likaKhoza: ummeli
wezokuHlaliswa kwaBantu, noMnuz Makhosini Nkosi, oyiMeya yaseNewcastle. Bonke laba baneziqu zomthetho futhi bakubeke kwacaca ukuthi bayakwazi abakwenzayo.
NgoLwesibili iJaji Jerome Mnguni uthe i-ANC KwaZulu-Natal iphule umthethosisekelo wayo ngokuthi kube nengqungquthela ngo-2015 esikhundleni sokuyenza ngo-2016. Ube esethi imiphumela yale ngqungquthela iyize leze.
NgoLwesithathu ubuholi be-ANC KwaZulu-Natal buthe buzoqhubeka nokuhola inhlangano futhi uaunqumo senkantolo buzosidlulisela enkantolo yokudluliswa kwamacala eseBloemfontein.
Ubuholi besifundazwe buzohlangana nobuholi be-ANC kuzwelonke namhlanje ukudingida udaba lwecala.
UMnuz Mdumiseni Ntuli, okhulumela i-ANC KwaZulu-Natal, uthe uDkt Khoza uzoqondiswa ubugwegwe ngeSonto ngoba ubuholi baKwaZulu-Natal busasebenza, abuhlakazwanga yi-ANC kuzwelonke okuyiyona enamandla okwenza lokho.
USethene uthe uDkt Khoza akakwazi ukuqondiswa ubugwegwe ngabantu abachithwe yinkantolo.
“Uma inkantolo isithe uhlaka oluphethe lwaphula umthethosisekelo we-ANC, kusho ukuthi alukwazi ukushushisa amalungu ayo,” kusho uSethene. USethene oyilungu le-ANC ubehlela ukuhlangana noDkt Khoza izolo ukuze bahlahle indlela eya phambili.
“Kufana nokumosha isikhathi ukuqhubeka necala ngoba alicaci ikusasa lobuholi obukhona ngenxa yemiphumela yecala,” kusho uSethene.
Uthe ngokwakhe ngabe ubuholi besifundazwe abusebenzi njengamanje kuze kuphume isinqumo esicacisa ngekusasa labo.
Uveze ukuthi elinye icala elibhekene noDkt Khoza wukuthi wathuka ubuholi besifundazwe, okuyicala elifana nelingekho njengoba inkantolo ithole ukuthi abukhethwanga ngendlela esemthethweni. Uthe uDkt Khoza uthola imiyalezo emsabisayo futhi yingakho engezanga ngesonto eledlule ekomidini lokuqondisa ubugwegwe. Uphethe ngokuthi uma i-ANC ifuna ukuqondisa uDkt Khoza ubugwegwe kufanele kube yikomidi eliqondisa ubugwegwe kuzwelonke kodwa akazi ukuthi kuzokwenzeka kanjani lokhu ngoba noSihlalo waleli thimba, uMnuz Derek Hanekom, usenkingeni ngenxa yokuphumela obala esho ukuthi akabethembi ubuholi bukaMengameli Jacob Zuma.