USenzo Mchunu phambi kwekhomishini

Isolezwe - - IZINDABA - MHLENGI SHANGASE

OWAYENGUNDUNANKULU waKwaZulu-Natal uMnuz Senzo Mchunu, uzothula ubufakazi kwikhomishini ephenya ngokubulawa kwabepolitiki iMoerane Commission ngesonto elizayo.

UMchunu, owayengusihlalo we-ANC esifundazweni owakhala ngaphansi engqungqutheleni yango2015, uzofakaza kule khomishini njengoba kuqhubeka ukubulawa kwabepolitiki esifundazweni.

Akuyena kuphela uMchunu ozofakaza ngelizayo kodwa nowe-IFP neSACP bazothula ubufakazi.

UNobhala wale khomishini, uMnuz Solo Mdledle uthe uMchunu uzofakaza ngoLwesithathu.

Uthe ngoMsombuluko kuzofakaza abasuka oPhongolo, ngoLwesibili kube i-IFP bese kuthi ngoLwesine kube yiSACP.

Abazwelana noMchunu basanda kuvunwa yinkantolo enkulu eMgungundlovu ngokuthi ingqungquthela akhishwa kuyona ngezikaMnuz Sihle Zikalala, onguSihlalo we-ANC yayingekho emthethweni.

EzikaMchunu kulindeleke ukuthi zihlangane kule mpelasonto zihlahle indlela eya phambili njengoba zifuna kuhlakazwe isigungu sikaZikalala.

Ikhomishini eholwa ngu-Advocate Marumo Moerane, yasungulwa nguNdunankulu uMnuz Willies Mchunu emuva kwezehlakalo zokubulawa kwabezombusazwe.

Iphenya ngezigigaba zokubulawa kwabepolitiki kusuka ngo-2011 kodwa noma ngubani ofuna ukufakaza ngezinto ezenzeka ngaphambi kuka2011 uvumelekile.

Asebethule ubufakazi kubalwa izinhlangano ezehlukene, Abahlali baseMjondolo, i-DA, osolwazi abehlukene, iSalga, izazi zamasiko, abaholi bomdabu, uphiko oluphenya amacala athinta amaphoyisa i-Ipid, nabalwela amalungelo omphakathi.

Kulindeleke ukuthi ne-ANC yethule ubufakazi kule khomishini ngaphambi kokuthi kusongwe ukulalelwa kobufakazi. Umbiko wekhomishini uyonikezwa undunankulu wesifundazwe.

Newspapers in Zulu

Newspapers from South Africa

© PressReader. All rights reserved.