Kwakhala nyonini kuKhozi FM siphulwa kangaka isiZulu?

MHLELI: Ngenanela incwadi ebhalwe nguMakhosini Mpofu waseMandeni ngoLwesithathu lapho ekhononda khona ngokusetshenziswa kolimi lwesiZulu emsakazweni uKhozi FM.

Kunini nje abantu bekhala ngodaba “lokukhonzela” eselaba yinsakavukela umchilo wesidwaba. Kuyishwa ukuzwa nabasakazi asebemnkantshubomvu emsakazweni bethi ukhonzela bani, bebuza kumlaleli osuke eshaye ucingo ngenhloso yokukhonza esihlobeni sakhe. Lafa elihle kakhulu. Nansi inselelo kumphathi siteshi, uMnuz Bonga Mpanza, akake asize aqondise lokhu kuphulwa kolimi lwesiZulu okuthi ngikhonzela usibanibani esikhundleni sokuthi ngikhonza kusibanibani. Bongumusa Mpanza KWAMASHU