Kulimale oyedwa kushayisana amatekisi

Isolezwe - - IZINDABA - INTATHELI YESOLEZWE

KULIMALE indoda eneminyaka elinganiselwa kwengu-20, izolo ekuseni ngesikhathi kushayisana amatekisi amabili ekhoneni lomgwaqo uFreese noPosselt, eNew Germany.

Le ndoda okuthiwa ibihamba ngezinyawo ngesikhathi kwenzeka le ngozi kuthiwa itholwe ilele eceleni komgwaqo.

UNksz Annine Siddall wakwaER24 uthe le ndoda inikwe usizo oluphuthumayo endaweni yesigameko.

Uthe le ndoda ibilimele emlenzeni nasemhlane kanti iphuthunyiswe esibhedlela eRK Khan.

UNksz Siddall uthe abashayeli bamatekisi balimale kancane kanti nabo baphuthunyiswe esibhedlela. Kulawa matekisi bebengekho abagibeli.

Khonamanjalo, kulimale owesifazane oneminyaka engu-44 ngemuva kokushayiswa yitekisi eduze komgwaqo u-Alpine eSpringfield izolo ekuseni.

UNksz Siddall uthe abezimo eziphuthumayo bafike endaweni yesigameko owesifazane elele eduze kwetekisi.

Lo wesifazane kuthiwa ubelimele umgogodla naseqolo kanti uphuthunyiswe esibhedlela e-Addington.

Umshayeli wetekisi okuthiwa ibinezingane zesikole ezingu-14 kuthiwa akalimalanga kodwa izingane ziphuthunyiswe esibhedlela ukuze ziyobhekwa ukuthi azilimele yini nokuthi zithole ukwelulekelwa ukuthuka.

Newspapers in Zulu

Newspapers from South Africa

© PressReader. All rights reserved.