‘Akekho ofika kuMbekile kwesokudla emuva’
UMQEQESHI weMamelodi Sundowns, uPitso “Jingles” Mosimane, ukhala ngomdlali weqembu u-Asavela Mbekile ongayizwa eyokudlala ngakwesokudla emuva.
UMosimane ukholwa wukuthi akekho umdlali ohlula uMbekile kwabadlala ngakwesokudla emuva. UMbekile uke wahlala isikhathi eside engadlali kodwa njengamanje useluleme ngokugcwele. Ukwazi ukudlala izindawo eziningi ngoba ubuye ayibambe enkabeni yenkundla.
Ngakwesokudla emuva ubanga indawo no-Anele Ngcongca, Thapelo Morena noSiyanda “Jojo” Zwane.
“Akekho ofika kuMbekile kubadlali abayibamba ngakwesokudla emuva. Inkinga yakhe iyodwa wukuthi yena akathandi ukusidlalela ngakwesokudla emuva. Namanje ngiyaphinda, akekho umdlali odlula uMbekile eNingizimu Afrika. UBongani Zungu naye ngamlanda kumaTuks edlala ngakwesokudla phambili. Ngamlanda ekade eshaye amagoli ayisishiyagalombili uma ngingaphosisi.
“Wathi efika ngamtshela ukuthi uzodlala enkabeni yenkundla. Ngamtshela ukuthi ngeke adlale ngasezinhlangothi ngoba ngimbona efanelwe unombolo 6. Ngamchazela ukuthi uma efuna impumelelo yesikhashana kulungile adlale ezinhlangothini kodwa uma efuna ukuya kude ebholeni lomhlaba kumele adlale unombolo 6. Buka manje ukuphi. USiboniso Gaxa naye wafika edlala phakathi nenkundla emuva kwiSuperSport United. Wamaka uMbesuma (Collins) eshisa kwiChiefs. Ngaleso sikhathi wayeneminyaka ewu-18. Ngamshintsha ngamdlalisa ngakwesokudla emuva. Wathuka wathi umqeqeshi ufuna ukungibulala. Ugcine edlala kwiNdebe yoMhlaba eNingizimu Afrika ngo-2010,” kusho uMosimane.
NgoMsombuluko uMosimane udlalise uNgcongca ngakwesokudla emuva. ISundowns iqumbe phansi iFree State Stars ngo 2-1 emdlalweni we-Absa Premiership eGoble Park, eFree State.
Amagoli eSundowns avalelwe enethini nguPercy Tau oshaye amabili kwathi eleFree State labaselwa nguNhlanhla “Villa” Vilakazi.
UMosimane uphinde waphumela obala ngesifiso sakhe sokwenza uTau umdlali ovelele eNingizimu Afrika.
“UPercy ngifuna ukumenza umdlali osezingeni eliphezulu. Ngesikhathi uKhama Billiat efika kwiSundowns wayeshaye amagoli amane kwinqwaba yamasizini kwi-Ajax Cape Town kodwa wafika lapha waqhulula inqwaba yamagoli. UPercy sifuna ukumenza umdlali ovelele eNingizimu Afrika kule sizini. Sike sacabanga ukwenza into efanayo ngesizini edlule kodwa sabuya sathatha isinqumo sokuthi simyeke kancane.”
NgeSonto iSundowns izobhekana neWydad Casablanca yaseTunisia emdlalweni weCAF Champions League eLucas Moripe Stadium, ngo-3 ntambama.