Baphenduka nayo iGolf GTD ize iyosithela
UBUHLE bayo kanjalo negama kwenza ukuthi abantu uma uqhamuka ngeVW Golf GTD baphenduke nayo ize iyosithela.
Uma ipakile, ufika beyishutha noma basondele bezobuza kabanzi ngayo.
Yinto engiyibone kahle ngesonto eledlule ngesikhathi ngihamba ngayo. Ngeke ubasole ngoba iseyintsha kwazise ifike ngoJulayi.
Kungokokuqala emlandweni weGolf ukuthi kube khona iGTD yingakho abantu bethuka uma beyibona kwazise bajwayele iGTI noma iGolf R.
IGTD yiyona moto yakwaVolkswagen kadizili eyi-hatch enamandla kuzo zonke kwezake zethulwa kuleli.
Empeleni ngegama elijwayelekile le moto yiTDI. Lokhu ukubona noma uvula ubhonethi ngoba iqoshwe ngegama elikhulu uTDI.
Injini yayo ingu-2.0 TDI ikhahlela amandla angu-130 kW ne-torque ka-350 Nm. Ukusuka ku-0 iye ku-100km/h kuyithatha imuzuzwana engu-7.4 kanti ijubane layo elikhulu bathi ngu-230km/h.
Idonsa nge-gearbox oyi 6-speed DSG futhi inama-paddle shift ngemuva kwesiteringi. Emgwaqeni iyinhlamvu, ungafunga ukuthi yiGTI uqobo. Umehluko ukuthi yona ayisiyona iVrrr Pha ngoba ayiqhumi.
Ihamba kamnandi futhi ikwenza ukhululeke ngoba inamathele futhi amajika iwashaya ngejubane ngaphandle kwenkinga. Engikuthande ngayo wukuthi intofontofo yize inyathela ngamasondo anamarimu angu18 inch.
Okuhle wukuthi iyonga nakudizili ngoba ngebanga lika-100km isebenzisa amalitha angu-5.3. Lokhu kube yinto enzima ukuyizuza ngoba kimina ibidla ngaphezulu kwamalitha ayisithupha. Yize kunjalo ngiyibone yonga.
Ezokuphepha zihlanganisa iBlind Spot Monitor with Rear Traffic Alert, Adaptive Cruise Control with Front Assist ne-Autonomous Emergency Braking System.
IGolf ingenye yezimoto eziyintandokazi kubathengi eNingizimu Afrika njengoba kusukela yethulwa eminyakeni elinganiselwa ku-40 eyedlule, sekudayiswe angaphezulu kuka-350 000.
IGolf GTD ibuphethe ubuhle futhi icishe ifane neGTI entsha bese ihluka ngezinto ezithize. Ezinye izinto eziwumehluko kukhona kuzo ulayini we chrome (osasiliva) ngaphambili ohamba uze uyoshaya kumaLED headlight. Lo layini ohamba kwi-radiator grill kwiGTI khona ubomvu. Naseceleni kwifenda iqoshwe uGTD.
Ngemuva ishaya ngezinqawe ezimbili ezindawonye ngakwesokunxele. Okunye okuyenza ibe yinhle yi-roof spoiler ngemuva ne-panoramic sun roof okhakhayini.
Inemibala ehlukene ongakhetha kuyo oTornado Red, Pure White, Dark Iron Blue Metallic, Atlantic Blue Metallic, White Silver Metallic, Indium Grey Metallic, Tungsten Silver Metallic, Deep Black Pearl Effect no-Oryx White Mother of Pearl Effect.
Ngaphakathi ishaya nge-infotainment system engu-9.2 inch Discover Pro okwazi ukuyilawula ngaphandle kokuthi uze uyithinte kodwa ngokunyakazisa isandla. Iveza umsakazo, inkombandlela, ikhamera ngemuva uma uhlehla, izithombe iselula kwiApple CarPlay noma i-Android Auto nokunye.
Ine-Active Info Display. Umshayeli uciphiza amabhathini asesiteringini ukuze abone inkombandlela, ijubane ahamba ngalo, indlela edla ngayo udizili, ukufona, ingoma edlalayo nokunye.
Izihlalo zayo ngizibone zithothene ngemuva okwenza abagibeli bangahlali kahle. Ezangaphambili ziyafudumala.
Okungichazile wukuthi uma ufuna ukwengeza isikhala sokulayisha ungadonsa inqola encane.
Uvula ibhuthi kube khona okundonsayo bese kuthushuka i-tow bar.
Inani: 2.0 TDI 130kW GTD DSG 506 700
RIphuma neService Plan yeminyaka emihlanu noma u-90 000km, iwarranty yeminyaka emithathu noma u-120 000 ne-anti corrosion yeminyake engu-12. Kumele uyise kwisevisi ngo-15 000.