Idonsa nasobhuqwini i-Audi Q5 2.0 TDI Quattro
NJALO uma ngihamba ngemoto ngenhloso yokuthi ngiyivivinye ngiye ngenze isiqiniseko sokuthi ngiyinakekela ngaphezu kweyami.
Ngakho kuke kwaba yinkinga ukuthi kuqhamuke ucingo oluvela ekhaya luthi kumele siye kwagogo ezintabeni zaseLenge, eWasbank impelasonto yonke. Okuyinkinga wukuthi itiyela lihamba liphele uma uqeda ukudlula e-Uitvaal usubheke ekhaya.
Uma uyibuka i-Audi Q5 uyabona ukuthi ngabe udlala ngayo uma uyifaka emgwaqweni oyibhuqu, kanti phinde, iwushaya iwukhiphe ngale. Lena esikhuluma ngayo namuhla i-Audi Q5 2.0 TDI Quattro. UQuattro usho ukuthi idonsa ngawo wonke amasondo. Yikho kanye okuvele kwangigqugquzela ukuthi ngihambe ngayo futhi angizange ngizisole. Uye ubone izimoto zikanokusho sezishaya kancane obhuqwini abanikazi bazo bevakashele emakhaya. Kulena akukho konke lokho, uhamba ngokukhululeka ngaphandle kwenkinga.
Phela ukuphakama kwayo kungu1.66 metres lokhu okuyenza amatshe ingawazweli. Ubude bayo bungu-4.66 metres kuthi ububanzi bayo bube ngu.189 metres. Ukuvuleka kwayo kwenza abagibeli abahlanu bahlale ngokukhululeka. Ebhuthini isikhala singu-610 litres kanti uma ulalise izihlalo zangemuva kuba ngu-1 550 litres. Khona ebhuthini inebhathini lokukhipha i-towbar uma udonsa inqola.
Njengoba ngikubalulile ngenhla ukuthi iyi-quattro. Inobuchwepheshe obubizwa ngequattro on demand obenza ukuthi ingadonsi ngamasondo angemuva uma ingasiboni isidingo kodwa uma sivela, amandla iwafaka emasondweni adingeka kuwo ngokushesha.
Lokhu kwenza ukuthi ungabi navalo ngokulala ezintabeni ngoba ngeke ubhajwe.
Umshayeli unebhathini lakhe le-Audi drive select lapho ekhetha khona ukuthi ufuna ihambe kanjani. Kukhona u-Off Road, Efficiency, Comfort, Auto, Dynamic no-Individual.
Konke lokhu ukwenza ukuze injini yayo engu-2.0 TDI isebenze ngokuhlukana. Le njini eyifour-cylinder inamandla angu-140 kW netorque engu-400 Nm. Kuyithatha imizuzwana engu-7.9 ukusuka ku-0 iye ku-100km/h. Kwa-Audi bathi ngebanga lika100 isebenzisa amalitha angu-4.9 kadizili.
Kulolu hambo lwami olube ngu-493.4 km isebenzise amalitha angu-6.7 ngebanga lika-100km. Kube yibanga elide kodwa elingazwakalanga ngenxa yokuba ntofontofo kwayo ezihlalweni zesikhumba. Okumnandi wukuthi ithule ngaphakathi okwenza ungacikeki ukuba ngaphakathi kuyo.
Nesithukuthezi usizwa ngendaba kwazise ine-screen esingu-8.3 inch lapho uxhuma khona iselula yakho nge-Apple CarPlay noma i-Android Auto bese iselula ivela kwi-screen. Lapho ucingo uliphendula ngebhathini esiteringini, imiyalezo ikufundele bese uyayitshela ukuthi iphendule ithini futhi nomculo okwi-phone iyawudlala. Inezipikha zeBang & Olufsen Sound System egqomayo.
Umshayeli une-Audi virtual cockpit engu-12.3 inch evele iveze yonke into phambi komshayeli ukuze engalokhu ebuka emaceleni. Iveza inkombandlela, speedometre nokunye.
Okokusiza umshayeli kuhlanganisa i-Adaptive Cruise Control, iyamsiza ukuthi ahlale emzileni futhi iyamuxwayisa uma ibona ubungozi ngendlela alandela ngayo enye imoto. Uma ukhanyisile ngo-bright ebusuku kuthi uma sekuqhamuka enye imoto izicime iphinde ikhanyise kakhulu uma ingasekho. Ephuma nakho: Amarimu angu-17 inch, ambient lighting package ehlukene ngemibala engu-30 eyenza ikhanyise ngezindlela ezahlukene ngaphakathi, Audi Drive Select, Audi Sound system, Bluetooth, isipele sesondo okwazi ukusigoqa usifuthe uma ususidinga, cruise control, driver information system etshela umshayeli ngesimo semoto, iyakusiza uma upaka ngemuva, LED rear lights othi oma ushaya i-indicator kube ngathi ayadweba, ama-airbag aseceleni ngaphambili nasekhanda,i-aircon yomshayeli, umgibeli eceleni nabangemuva nokunye.
Ngaphezu kwalokhu, iSport inamarimu angu-18 inch, Aluminium door sill trim, bumpers in full paint finish, High gloss package, Interior inlays with aluminium, LED headlights, Line specific radiator grille, Line specific rear diffuser and air intakes, Sport seats neSteering wheel with chrome Inani Q5 2.0 TDI quattro S tronic: R 698,000 Q5 2.0 TDI quattro S tronic Sport: R 748,000