Bazongenela ngeToyota Hilux entsha

Isolezwe - - EZEZIMOTO - INTATHELI YEZEZIMOTO

IQEMBU leToyota Gazoo Racing SA lizongena lihamba ngeToyota Hilux entsha emjahweni owandulela owamanqamu weSouth African Cross-Country Series (SACCS) ngale mpelasonto eSun City 400.

Ozobe esesiteringini nguGiniel de Villiers elekelelwa nguDennis Murphy.

Kuzokhumbuleka ukuthi sebesele bodwa eqenjini leToyota Gazoo Racing SA njengoba uzakwabo uLeeroy Poulter ahoxa ngenxa yobuthakathaka besimo sempilo.

UDe Villiers noMurphy bangaphansi kwengcindezi yokugcina irekhodi lakwaToyota lokungahlulwa.

UMengameli weqembu leToyota Gazoo Racing SA uGlyn Hall, uthe bafuna ukuzama ukunqoba umjaho.

“Kunjalo sifaka iToyota Hilux yethu entsha futhi yize sayihlola ngayo yonke indlela kodwa kuzobe kungokokuqala isemjahweni.”

Ngaphandle icishe ifane nendala kodwa ithuthukise indlela ehamba ngayo ne-suspension ukuze izame ukunqoba iDakar Rally ngoJanuwari wonyaka ozayo.

Lo mjaho uzoqala namhlanje uze uphothulwe kusasa. Kusasa umjaho uzoqala ngo-7.30 ekuseni kanti kuzohanjwa ibanga elilinganiswa ku-175km kabili.

Ababukeli bazobe bengena mahhala kulo mjaho oseSun City.

Newspapers in Zulu

Newspapers from South Africa

© PressReader. All rights reserved.