Udubuleke emathuneni washona efihla umngani
KUSHONE obezongcwaba umngani wakhe abesebenza naye, kwalimala ababili ngesikhathi kuqhunyiswa isibhamu emathuneni Ekuvukeni, eMnambithi, ngoMgqibelo.
Kuthiwa lesi sigameko senzeke kufihlwa uMnuz Mtshengiseni Sikhakhane naye okuthiwa ubulawe ngokudutshulwa emasontweni amabili edlule.
Umlisa ogama lakhe ligodliwe ngoba kungakaqikinisekiswa ukuthi umndeni wakhe usubikeliwe ngesehlo, udutshulwe washona esemathuneni.
Abalisa ababili, uMnuz Vukani Thwala (33) wakwaJwili odubuleke kanye ethangeni noMnuz Celukuthula Thusini (29) waseMsinga odubuleke kanye esifubeni, bona baphuthunyiswe emtholampilo base bedluliswa bayiswa esibhedlela ngenxa yamanxeba abo. Lo mlisa kuthiwa ubesuka eWelkom lapho ebesebenza khona emayini noSikhakhane. Okhulumela amaphoyisa KwaZuluNatal uLt Col Thulani Zwane ukuqinisekisile ukuthi amaphoyisa aphenya ngalesi sigameko nokuthi bekungakaboshwa muntu okwamanje. “Kuvulwe icala lokubulala, namacala amabili okuzama ukubulala. Kukholakala ukuthi laba bobathathu badutshulwe ngabantu abebezidlulela nje. Siyawanxusa amalungu omphakathi ukuthi ayeke ukuqhumisa izibhamu ngoba lokhu akukho emthethweni, phezu kwalokho, kubeka impilo yabantu engozini,” kusho uZwane.
Ngokusho kwamaphoyisa bekuneminingwane ebitholakele ebithi, kungenzeka ukuthi ukudutshulwa kukaSikhakhane bekuhlobene nezindaba ezithinta amatekisi – kodwa ngokuhamba kwesikhathi kube sekuvela ukuthi akuhlobene.
Kuthiwa abasolwa abakaziwa okwamanje futhi nesizathu sokudutshulwa kwalaba abadubulekile asikaziwa ngaphandle kokuthi balinyazwe yizinhlamvu ngesikhathi kusuka abathile beqhumisa isibhamu emathuneni.
Kwenzeka lesi sehlo nje kusanda kubikwa esinye sokubulawa kukaMnuz Thabani Hadebe obesebenza emakhazeni akwaGama’s Classic Funerals naye owadubuleka ngesikhathi kuqhunyiswa isibhamu, elethe isidumbu eMolweni.