ULerato nethuba elingandele bani
UNYELWE yinyoni esandleni uLerato Kganyago, njengoba engowesifazane wokuqala omnyaka wakuleli ukuyodlala njengoDJ, endaweni yobumnandi, Ibiza, eSpain.
ULerato ongumsakazi weMetro FM, uthe bese kuyizinyanga ezimbili ethule nalezi zindaba ezamshiya emangele. Engxoxweni abe nayo neSolezwe, ubebonakala ukuthi ujabule ngokuthola leli thuba.
“Yebo ngizoba ngomunye woDJ abazodlala kule ndawo. Ngiswele amazwi. Lokhu kusho lukhulu kimina njengoba ngingowesifazane wokuqala kuleli ukuthola leli thuba. Yinhlanhla engandele bani kule ndima esikuyo, ikakhulukazi e-Afrika,” kusho uLerato.
Uthe okwenzekile akusho ukuthi uzoshiya emsakazweni kodwa uzoqhubeka ezenza nezinye izinhlelo abonakala kuzo.
“Bengingakafuni ukuthi abantu bazi, ngoba vele sekuputshukile, sesingakhuluma ngazo lezi zindaba. Inkontileka yami isikhona eqinisekisa ukuthi ngempela ngizobonakala kule ndawo,” kuchaza yena.
ULerato uthe esitatimendeni azosikhiphela abezindaba maduze nje uzoveza ukuthi uzoyenza kanjani eminye imisebenzi .
Le ntokazi ayigcini ngokuba umsakazi weMetro yethule nohlelo lomculo iLive Amp, olungena ngoLwesihlanu kuSABC 1.
ULerato uthola leli thuba nje, uDJ wakuleli uBlack Coffee ukhona eSpain udlala khona uma kunemicimbi. UBlack Coffee waba ngowokuqala kuleli ukuthola leli thuba eliyingqayizivele kuleli.
Kule ndawo kuba nemicimbi emikhulu ngesikhathi sasehlobo.