‘Ngeke iphazamiseke eyokukhetha ubuholi’
NGEKE luyiphazamise ingqungquthela yokukhetha ubuholi ngempelasonto uthuthuva olusuke ngeSonto emhlanganweni we-ANC esifundeni uKhahlamba kudingidwa isinqumo seNkantolo eNkulu yaseMgungundlovu.
UMnuz Mdumiseni Ntuli okhulumela i-ANC KwaZulu-Natal, uthe ukufika emhlanganweni kwamalungu enhlangano abengabiziwe eze nezikhalo bekungavumelekile.
Uthe nakuba engakayitholi yonke imininingwane ngokuthi kwenzekeni emhlanganweni kodwa uyazi ukuthi kunamagatsha abenezikhalo ezithile.
“Amagatsha athintekayo ngizohlangana nawo kusasa (namuhla) khona Okhahlamba, silungise izinkinga akhala ngazo,” kusho yena.
Uthe akulona isiko le-ANC ukuya emhlanganweni ongabizwanga kuwo.
Uthe bekumele abanezikhalo uma kwenzekile baya emhlanganweni bafike basho izikhalo zabo bese beyahamba, bangaphazamisi umhlangano.
UMnuz Mlungisi Ndlangisa okhulumela i-ANC kulesi sifunda, uthe udaba lokungeneliseki lwabaphazamise umhlangano ludingidwa ezingeni lwesifundazwe. Akazi ukuthi kungani beze emhlanganweni.
Uthe ngokwazi kwakhe kulimale ababili ngenxa yokunyathelana kwabantu, bebaleka.
UMnuz Thulani Sibeko, okhulumela amagatsha angenelisekile, uthe baye emhlanganweni ngoba befuna ukubuza ukuthi izikhalo zabo zizoxazululwa nini nokuthi zizoxazululwa ngubani.
“Ngokwazi kwethu ubuholi obukhona njengamanje esifundazweni ngeke bukwazi ukuxazulula izinkinga zethu ngoba inkantolo ithe bakhethwa ngendlela engafanele,” kusho uSibeko.
Uthe akubona abaphazamise umhlangano kodwa uphazanyiswe wukuthi ngesikhathi bebuza lokhu kube nabanye abaphakamise izandla bebuza ukuthi kanti umhlangano ungowani.
“Ubuholi obebukhona buphume baya kwelinye igumbi elikhona ehholo. Ngemuva kwalokho kwangena amaphoyisa, asifice sicula, singalwi namuntu, aqhumisa isiqhumane, kwahlakazekwa. Akukho okubi esikwenzile. Sifuna kuxazululwe izinkinga esaziphakamisa ngaphambi kokuthi kuyiwe engqungqutheleni,” kusho uSibeko.
Uthe ngokwazi kwakhe kulimale abahlanu ngenxa yokududulana nokugxobana abantu bebebaleka ngoba kukhona obebebashaya ngasemnyango.
Okhulumela amaphoyisa kulesi sifundazwe, uCaptain Nqobile Gwala, amaphoyisa aqhumise ibhomu lokwethusa ukuhlakaza isixuku ebesixabana kubangwa ukungena emhlanganweni.
Uthe kuboshwe abantu ababili ngokususa uthuthuva emphakathini.
Ingxabano uthe kusolwa ukuthi isuke kubangwa ukungena emhlanganweni. Kusolwa ukuthi abanye ebehambele umhlangano bavulele ngesibhaxu komunye.
“Olimele uphuthunyiswe esibhedlela,” kusho uCaptain Gwala.