OKlebe baphenya omasipala ngobugebengu
UPHIKO loKlebe oluphenya ngamacala obugebengu obuhleliwe, luphenya amacala enkohlakalo athinta omasipala bowesiFunda iHarry Gwala.
Okhulumela lolu phiko kuzwelonke, uBrigadier Hangwani Mulaudzi, izolo uthe angu-12 amacala enkohlakalo asevuliwe kulesi sifunda, amane kuwo asaphenywa. Uthe amane avele asenkantolo.
Amane uthe asedluliselwe ophikweni lwezokushushiswa komphakathi okumele luthathe isinqumo ngawo.
Uthe amagama omasipala abancane abangaphansi kowesifunda, abathintekayo ngeke avezwe ukuze kuvikelwe ofakazi abalekelela ophenyweni oluqhubekayo.
Uthe iningi lamacala avuliwe enzeke nonyaka, lilodwa kuphela okuvele ukuthi lenzeke nyakenye. Phakathi kwamacala aphenywayo kukhona awokweba, awokugwazisa, nawokungaphathwa ngendlela kwezinto zikamasipala.
Inhloko yalolu phiko esabambile kuzwelonke, uLt General Yolisa Matakata uwushayele ihlombe umsebenzi wamaphoyisa wokulwa nenkohlakalo ethinta izikhulu eziphezulu kuhulumeni nezinkampani ezizimele.
“Inkohlakalo ibukela phansi iqhaza lamaphoyisa kuleli. Ukukhala kwesizwe sethu ngeke sikuzibe. SiwuPhiko loKlebe sinikezwe umsebenzi wokuthi sibambe abafuna ukuzicebisa ngokungemthetho, ngesikhathi iningi labantu bakuleli lizwe lihlupheka. Ngeke ngikuvumele lokho. Sengiyalele izinhloko kuzo zonke izifundazwe ukuthi zihlale ziqaphile ukuze siqede lesi sihlava ngokushesha,” kusho uLt General Matakata.
Uthe bazimisele ukusebenza ngaphandle kokwesaba nokwenzelela.
Unxuse izinkantolo ukuthi zixhase uhulumeni ngokushushisa ababandakanyeka ebugebengwini.
Khona manjalo amaphoyisa asekhiphe umklomelo ka-R450 000 kunoma ngubani ongaba nolwazi olungaholela ekuboshweni kwabasolwa ngamacala ahlobene nokubulawa kwabezombusazwe esifundazaweni.
Lolu phiko luveze ukuthi sekukhona olumbophile ngokubulawa kowayenguNobhalajikelele we-ANCYL uMnuz Sindiso Magaqa, nokuzama ukubulala uNksz Nontsikelelo Mafa (27) noNksz Jabu Msiya (44).
Kodwa kwabuye kwavela ukuthi umuntu ohlanganiswa naleli cala nguMnuz Jabulani Mdunge (38) owadutshulwa washona nabanye abathathu, kwaboshwa abangu-7 ngesikhathi amaphoyisa etholana phezulu nababeyobamba inkunzi ku-N2 ngaseHarding.