Uhlehlile owesigungu se-ANC
UHLEHLELE uLwesihlanu umhlangano wesigungu esiphezulu se-ANC esizonquma ngekusasa lobuholi be-ANC esifundazweni obuchithwe yiNkantolo eNkulu eMgungundlovu ngeledlule.
Lo mhlangano obekumele uhlale izolo, uhlehliswe ngoba amanye amalungu esigungu, angongqongqoshe aye emhlanganweni i-United Nations General Assembly eMelika.
Okhulumela i-ANC, uMnuz Zizi Kodwa, uthe lo mhlangano kudingeke ukuthi uhlehliswe.
“Iningi lamalungu lihambele umhlangano ngakho umhlangano ubungeke uhlale.
Lo mhlangano (oseMelika) uqala namhlanje kuze kube uMsombuluko ozayo.”
Abanye bongqongqoshe abaphelezele uMengameli Jacob Zuma kulo mhlangano kubalwa owezoBudlelwano naMazwe oMhlaba uNkk Maite NkoanaMashabane, owezokuVikela uNkk Nosiviwe MapisaNqakula, owezokuPhepha kwezwe uMnuz David Mahlobo, owezeMvelo uNksz Edna Molewa nowezaManzi uNkk Nomvula Mokonyane.
Izinhlangano ezimbili, oluholwa nguMnuz Sihle Zikalala oluchithwe yinkantolo noluhambisana noMnuz Senzo Mchunu, owayengusihlalo we-ANC futhi engundunankulu zithembele esinqumeni sesigungu esiphezulu mayelana nokuzokwenzeka esifundazweni.
Uhlangothi lukaZikalala lwatshelwa isigungu esiphezulu ukuthi alumise isinqumo sokudlulisa icala njengoba lwaphumela obala lwathi luzoludlulisa leli cala.
OlukaMchunu lona lufuna kube nobumbano ukuze i-ANC ingaphelelwa ukwethenjwa futhi ingafi esifundazweni.