Asizovuma ukulawulwa siyi-ANC: Mantashe
UNOBHALA jikelele we-ANC, uMnuz Gwede Mantashe, uthi akayingeni eyesinqumo senkantolo mayelana nombango okhona phakathi kwezinhlangothi ezimbili ze-ANC, oluholwa nguMnuz Sihle Zikalala noluholwa nguMnuz Senzo Mchunu KwaZulu-Natal.
INkantolo eNkulu yaseMgungundlovu isanda kukhipha isinqumo esichitha umphumela wokukhethwa kobuholi bale nhlangano KwaZuluNatal bangoNovemba 2015.
Umphumela walapho wavuna uhlangothi lukaZikalala ongusihlalo wale nhlangano.
Uhlangothi olweseka uMchunu owayengusihlalo nondunankulu ngaleso sikhathi, aluzange lugculiseke ngemiphumela lwagcina udaba luluyise enkantolo, egcine ivune uhlangothi lukaMchunu.
“Akekho umuntu okumele asitshele ukuthi kumele izinto zethu sizihambise kanjani kwi-ANC,” kusho uMantashe. Ubephawula mayelana nomhlangano okulindeleke ukuthi isigungu esiphezulu sale nhlangano sibe nawo ngoLwesihlanu ngenhloso yokuthola isixazululo phakathi kwezinhlangothi ezibangayo e-KZN. “Thina njenge-ANC sizozilungisela izinto njengenhlangano,” kusho uMantashe. Uphendule kanje emuva kokubuzwa ukuthi sebethathe siphi isinyathelo njengesigungu esikhulu mayelana nokushiwo wuhlangothi lwabahambisana noMchunu, oluthi kuzomele baphume ehhovisi abalahlwe yinkantolo ngemiphumela. UMantashe uthe akekho umuntu okufanele abalawule njenge-ANC ukuthi abenzeni enhlanganweni. Ubephendula ngomphumela wenkantolo ochithe imiphumela yango2015. “Ngeke ngiphawule ngemiphumela THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. yenkantolo, thina njengenhlangano sinendlela yethu esihambisa ngayo izinto,” usho njalo.
Okhulumela abamangali, uMnuz Sthembiso Mshengu, uthe angakusho ukuthi i-ANC ayikho ngaphezulu komthetho waseNingizimu Afrika.
“Ngizocela ukungaphawuli kakhulu ngoba vele asimenywanga kulo mhlangano wangoLwesihlanu. Ngokwethu sisami esinqumeni esikhishwe yinkantolo nje kuphela,’’ usho kanje uMshengu ngamafuphi.
Lo mhlangano okulindeleke ukuthi ube ngoLwesihlanu kade ulindeleke ukuthi ubanjwe izolo.
Isigungu esiphezulu se-ANC singenelela nje, uhlangothi oluvunwe yinkantolo lwakuphakamisa phambilini ukuthi lwasibikela lesi sigungu kodwa salushaya indiva lolu daba njengoba sesiyophinde siluhlalele ngoLwesihlanu.
Phezu kokuthi ibikade ingasekho eminye imihlangano obekumele lesi sigungu esiphezulu siyihlalele, kuye kwaphoqeleka ukuthi iluhlalele lolu daba lwalezi zinhlangothi ngenxa yokuba bucayi kwalo, kwazise lubeka ubumbano lwale nhlangano esimeni esibucayi.